Non, benquerido lector, non. Non é que me trabucase eu, nin os meus compañeiros da redacción. O título que acaba de ler é exactamente igual có da última columna que escribín o pasado sábado, pero está colocado con toda a intención porque de regresar ó pasado vai ser do que vou seguir reflexionando malia que o tema non sexa o mesmo, é dicir, o da modificación da planta xudicial, senón o preocupante situación pola que transitan as tres Universidades galegas.
As cifras que reproduce a información de hoxe -de onte, para vostede- deste mesmo xornal é, como escribía denantes, certamente preocupante.
En catorce anos o Campus de Ourense, que tanto suor e bágoas custou conseguir, perdeu nada máis e nada menos ca 3 mil alumnos. Se continúa a tendencia descendente, a nada que redondeemos, os mesmos que haberá matriculados dentro de dous ou tres cursos.
Non vou ser eu quen lle vaia dicir á comunidade docente do Campus ourensán cómo debe ser deseñado o futuro da Universidade en Ourense. Se ben, a contundencia que dá saber que dende hai catorce anos polos edificios das Lagoas camiñan cada ano tres mil alumnos menos, debería facer reflexionar a moitos máis cás propias autoridades académicas, igual que debe facer reflexionar a toda a sociedade o devalo imparable polo que se esvaece a sociedade ourensá en xeral.
Neste contexto e dando para o que dá unha columna coma esta, a min paréceme que contra a crítica reflexiva que supuña o titular do pasado sábado no sentido de non cometer o erro de volver ó pasado, respecto do sistema universitario galego, a min dáme que si que deberiamos comezar a valorar a posibilidade de volver ó pasado e, aínda que semelle un imposible, empezar a deseñar un sistema universitario único.
É certo que xa están os edificios. É certo que cada liña formativa xa conta co seu profesorado. É certo que as carreiras -ou os graos- están perfectamente establecidos en cada localidade e que non é tan sinxelo, da noite para a mañá, establecer novos ciclos ou trasladalos de lugar.
Ora ben, realmente ten sentido -pregunto eu- que haxa tres rectores, tres equipos con toda a triplicación que iso conleva para que nas tres universidades haxa tres facultades nas que se estuda historia, comunicación, empresariais ou dereito, por poñer catro exemplos? Repito, simplemente pregunto.