Qué sabemos de Olli Rehn? O 90 por cento preguntará quen é ese, pero é o que manda no cotarro, e do que hoxe depende a política de tolerancia cero en materia de gasto, que dá lugar, por exemplo, a que non haxa auga nalgúns hospitais. A distancia aparente que existe entre Rehn e a auga dos hospitais, que hai que medir en anos luz, dá medida do actual déficit democrático. Nin o máis despótico réxime da historia soñaría tal grao de insonorización, impunidade e opacidade do poder. De Rajoy o sabemos case todo, e polo tanto temos modo de darlle caña no Congreso, na prensa ou na rúa; pero Rajoy é só un prefecto provincial. Pola contra, de Olli Rehn temos pouco máis que nome e foto. Aínda sen foto, sabemos bastante máis do Espírito Santo. Como isto non é normal, debemos consideralo un fenómeno paranormal, deses que anuncia que algo vai pasar.
