Aínda que a gran emigración cara á Oeste que tivo lugar nos Estados Unidos a mediados do século XIX tratouse xa en westerns anteriores, “A caravana de Oregón” (1923) foi a primeira película que reconstruíu a experiencia dándolle as mesmas dimensións que tivera en realidade e poñendo o acento no carácter épico da mesma.
O filme rodouse case enteiro en espazos naturais, situados na súa totalidade na rexión fronteiriza entre Utah e Nevada, en condicións que foron ás veces tan arduas, tan duras como as que tiveron que sufrir os auténticos pioneiros. Tratábase dunha innovación asombrosa con respecto ás rodaxes en estudio e estreitamente supervisadas polos responsables económicos das produtoras, e só existía un precedente, o de “Nanuk o esquimó” (1922), de Robert Flaherty. Fenómenos naturais imprevistos incorporáronse ó guión sobre a marcha. Utilizáronse indios auténticos (máis de 750) e a maioría dos 500 carromatos empregados tamén eran xenuínos e non feitos ex profeso para a película. Realizáronse numerosas investigacións históricas para que “A caravana de Oregón” tivese a maior autenticidade posible.
O presuposto foi cinco veces superior ó dos westerns da época. Acabou valendo 782.000 dólares, cando se acordara que non pasase dos 500.000. Menos mal que tivo un gran éxito e recadaron case cinco veces máis do que custara. Tanto que, en 1935, aínda seguía figurando entre as películas con maior recadación ata dito ano.
Desgraciadamente, “A caravana de Oregón” non existe xa na súa forma orixinal. Desapareceron frecuencias tan dramáticas como a do incendio da pradaría e suprimíronse tamén detalles documentais para darlle maior relevancia ós personaxes e á trama. O filme presenta o punto de vista dos indios, e indica claramente que loitaban para defender a súa forma de vida e as súas costumes.
Sorprendentemente, non se fixo nunca unha versión ou adaptación de “A caravana de Oregón”, aínda que Ernest Torranxe e Tully Marshall volveron a interpretar os personaxes de Bill Jackson e Jim Bridger en “Caravanas bélicas, camiño do Oeste” (1931), da Paramount.
