Marcos Argibay Gago: "O Esquecemento non é de tres, é de todo Xinzo"

Nova directiva, novo cargo para vostede. ¿Como afronta este reto? Queremos cambiar o concepto que a xente de Xinzo ten sobre o Esquecemento. Sempre tivo algo de mala fama: moitos pensan que é un botellón ou unha festa privada. Nós eso todo queremos eliminalo. Para iso queremos quitar actividades do interior do campamento e levalas ao resto do pobo. Queremos facer espectáculos, animacións… Moito desto está xa atado. Falta confeccionar o programa, pero xa sabemos as empresas que van a vir e que van facer. O Esquecemento non é unha cousa de tres, é de todo Xinzo. Tamén barallamos poñer algunha caseta máis para a xente que queira vir sen grupo e facer actividades cos escolares mediante un cómic. Xa que vostede menciona esa idea que ten a xente de Xinzo, que non pertenece a Civitas, sobre o Esquecemento… Anteriores directivas tamén se marcaron como obxectivo mudar esa imaxe e abrir a festa ao resto do pobo, ¿non se ten logrado isto? Penso que non. É algo complexo de comprender. Penso que para facelo habería que remontarse tempo atrás na historia de Civitas, algunhas discrepancias internas ou á mestura coa política nalgún momento. Agora súmase o tema do botellón, de pensar que o Esquecemento é iso, e non é así. É unha festa histórica e a xente que fai botellón faríao igual noutras festas de Xinzo. Algo que penso que tamén afectou negativamente nos últimos anos foi cobrar a entrada ao campamento. Dende a nova directiva queremos analizar esto último e ver se é posible e viable para nós que desapareza. Por que é necesario cobrar esa entrada? Principalmente por unha cuestión de control e para sufragar os gastos en seguridade. Nós contamos co apoio da Deputación e tamén do Concello de Xinzo, pero esta axuda cubre 40 por cento do gasto total, o resto é cousa dos socios, das nosas actividades e dos patrocinadores e negocios locais, que son fundamentais. Digamos que temos que sacarnos un pouco as castañas do lume para poder facer a festa. Nós estamos contentos coa axuda que nos da o Concello, sobre todo, a nivel loxístico, pero confiamos que, pola súa banda, o aporte económico sexa máis elevado e equitativo para futuras edicións entre a nosa festa e outras que tamén se organizan na vila. A min paréceme ben que se apoie a todo o mundo, pero o Esquecemento é a segunda festa máis importante de Xinzo e ten lugar na fin de semana máis destacada do verán. A anterior directiva dimitiu aqueixada dunha “falta de unión da asociación”, ¿teñen vostedes esta impresión? De ser así, teñen traballo neste senso tamén. Non estou moi de acordo con esas palabras da directiva saínte, non obstante, penso que si había unha desilusión motivada polo paso dos anos e agravada pola situación derivada da pandemia. Penso que co cambio de aires, que sempre é positivo, estamos dando un chute de ilusión, e proba disto foi a xente que acudiu á xuntanza do pasado venres: éramos máis de 100. A xente ten ilusión e ten ganas. A do ano pasado foi unha edición de transición, e o anterior non houbo Esquecemento, ¿cre que este paréntese puido afectar á festa? Era unha dúbida que tiñamos todos, por eso xuntamos á xente tan cedo este ano: para saber como estaban os ánimos. Comprobamos que si, que foi unha paréntese e todo vai a seguir como estaba. Contamos con cinco grupos novos. Vamos a traballar porque o Esquecemento sexa máis grande do que era e tamén cremos que é o momento, despois de 20 anos de historia, en loitar porque se declare como Festa de Interese Turístico Galego -actualmente conta co distintivo de Festa de Interese Turístico Local-. Tamén queremos ter máis presencia en redes sociais. Nesta edición a festa recuperarase en todo o seu esplendor? Recuperamos todas as actividades principais da festa. Haberá algún cambio a mellor nos desfiles para que a xente os disfrute máis. Hai un socio histórico da festa, Carlos Otero, que se encargará de dirixir o teatro. Non se pode inventar nada, pero queremos coller o mellor que se fixo en cada ano e traelo a esta edición.