Achegouse ata Carballeda de Avia para recoller as demandas dos afectados pola vaga de lumes
"Entristecida de ver como están os montes, pero tamén impresionada pola entereza e o valor destas persoas". Así se expresaba Milagros Otero, a Valedora do Pobo, que se achegaba onte ata Carballeda de Avia para coñecer o desastre ambiental que supuxo a vaga de lumes que afectou ao Concello no pasado mes de outubro e escoitar as demandas dos veciños.
Milagros Otero chegaba a primeira hora da mañá a Carballeda e, acompañada polo alcalde, Luis Milia, recorreu algúns puntos negros dos incendios. Ao mediodía mantiña, na Casa do Concello, unha reunión co alcalde e membros da Corporación Municipal.
Xa pola tarde, entre as 16,00 e as 18,00 horas, tivo un encontro cos veciños de Carballeda, moitos deles afectados polos incendios. "Escoitei as súas queixas e demandas, non sólo polos danos que sufriron polo lume", afirmou Milagros Otero. A Valedora recoñeceu que ao escoitar aos veciños viu "o que sufriron" ao ter o lume á porta das súas casas e nas súas propiedades. Na reunión saíron tamén problemas de telefonía, de transporte, de traídas de auga, de limpeza, "e o máis curioso, un tramo de kilómetro e medio, preto do pobo de Saa, que carece de todo tipo de telefonía, algo inconcebible a estas alturas".
"Eu escoiteinos, que é a miña obrigación, e agora trasladarei as súas demandas aos poderes públicos, ás administracións, para que fagan efectivos os seus dereitos", asegurou a Valedora do Pobo.