As Asociacións de Nais e Pais de Alumnos (ANPA) e os centros educativos do concello de Barbadás recibirán un total de 6.000 euros para a realización de actividades e para dar apoio aos diferentes servizos que prestan, como, por exemplo, o de conciliación. Disgregando as contías que recibirá cada colectivo, cada unha das ANPAs (do CEIP Filomena Dato, Ruxidoiro e do IES Ferro Couselo) recibirán mil euros; mentres que os dous colexios (o instituto queda fóra ao non pertencer ao concello) recibirán 1.500 euros cada un para chegar ata eses 6.000 euros de axudas.
A concelleira de Educación, Marga Pérez, asegura que esta contía económica “será de gran axuda para cofinanciar as actividades que se propoñen para o alumnado dende o claustro de profesorado e dende as ANPAs, non só dos colexios do termo municipal senón do IES Ferro Couselo, onde acude a nosa mocidade”.
Esta axuda “permitirá ampliar a oferta de actividades para os escolares e sumarase a toda a programación que se propón dende o Concello de Barbadás ao longo do curso escolar dende as diferentes áreas de Educación, Cultura e Igualdade”. Ao longo de todo o ano ofrécense espectáculos de teatro, cine ou exposicións e organízanse celebracións en datas destacadas. “Tamén cómpre destacar os obradoiros que promove o Concello entre os mozos para traballar os valores do respecto e a igualdade”, apunta. Esta achega económica servirá ademais para dar apoio aos servizos que se ofrecen dentro dos colexios para favorecer a conciliación das familias como as “mudas escolares”, “Bos días cole” e diferentes actividades extraescolares.
