A Asociación Internacional Bemposteña (Aibem) esixiu a devolución da titularidade dos terreos onde se asenta a Cidade dos Rapaces, tras denunciar a súa venda "fraudulenta" por intereses económicos
Nun comunicado, esta asociación acusa a fundación de rexistrar o predio en que desenvolveu o seu labor social o padre Silva ao seu nome co fin de quedar con parte do diñeiro en lugar de dedicalo a fins fundacionais.
Así, na querela admitida a trámite, denunciara a venda do predio por 4 millóns de euros a Nova Bemposta, tras o cal detectaron ingresos por diferentes importes, así como retiradas de diñeiro e transferencias sen xustificar.
Tras anos de conflito polos terreos, o Xulgado de Instrución 2 de Primeira Instancia de Ourense, nun auto do 26 de abril, ordenou a execución da sentenza emitida pola Audiencia Provincial, anulando a celebración de dúas asembleas en que se acordou a venda dos terreos a Nova Bemposta.
A asociación esíxelles aos patróns actuais "o cesamento inmediato" das súas atribucións e insta as institucións públicas, entre elas ao Concello de Ourense, a que "tome en consideración" este problema, tras sinalar que a fundación carece de "lexitimidade e legalidade" sobre a xestión dos terreos.
Aibem cre que desde a fundación "se apropiaron de diñeiro". Para iso, acusan os seus responsables de "anunciar aos catro ventos" a venda de proxectos, como a escola internacional de circo, para dar normalidade de actividade co fin de obter subvencións e axudas públicas.
Pola contra, asegurou que conta con certificacións do Ministerio de Cultura "en que se establece que en todos estes anos a Fundación Bemposta declarou non ter actividade nin ningún proxecto para desenvolver".
