Ciencia con voz feminina en Ourense

A sétima edición da feria de divulgación e ciencia, coñecida como “eXXperimenta en Feminino”, desenvolveuse onte no Edificio Politécnico do Campus de Ourense. A iniciativa une un amplo colectivo de persoal investigador da Facultade de Ciencias, a Escola Superior de Enxeñaría Informática, a Escola de Enxeñaría Aeronáutica e do Espazo e a Escola Universitaria de Enfermaría, co obxectivo de visibilizar o papel da muller nestes eidos e atraer vocacións, principalmente, entre as nenas e rapazas. Unha das organizadoras e profesora da Escola Superior de Informática, Alma Gómez, incide en que segue a haber menos porcentaxe de mulleres que escollen estas especialidades para estudar. “Consideramos que perdemos a metade do talento e estas carreiras teñen proxección e oportunidades de traballo. Non queremos que elas se perdan iso. Normalmente, ás nenas as solen conducir ás Ciencias da Saúde e aquí tamén se pode facer a función de coidar a través de deseñar programas que detectan o cancro moito antes pois tamén fas esa labor, por exemplo”, explica. Multitude de estudantado Dende primeiras horas da mañá ata as 15,00 horas non paraban de pasar grupos de estudantes de variadas idades e centros na Facultade. “Este ano temos constancia de que virán 350 persoas e, aínda así, tivemos que deixar atrás arredor de oito ou nove centros de estudos por falta de espazo”, especifica a organizadora. A través dun itinerario, guiado por integrantes da facultade das ciencias, os visitantes podían percorrer diversos stands e aulas das diferentes especialidades. “Procuramos que o percorrido sexa cercano e interactivo para atraer e achegarnos aos visitantes”, indica a doctoranda en Ciencias e Tecnoloxía dos Alimentos, Andrea Luaces. “Se agradece que haya tanta atención. Sobre todo llama la atención por parte de los más pequeños. Hacen preguntas muy interesantes”, indica. O mesmo opinaban os estudantes de doutoramento de Ciencias Ambientais que trouxeron todo tipo de meles, experimentos con polen e niños de velutinas para divulgar o seu traballo. O posto que máis causou sensación foi o de Grao de Aeroespacial. A estudante Uxía Lápido, indica que “achegar experimentos como o de ver funcionar a turbina dun avión, fan moito máis cercanas as ciencias”. Tamén dí que estudar en Ourense é “unha oportunidade pola cercanía e o bo ambiente da cidade”, conta.