A directora xeral de Xuventude, Participación e Voluntariado, Cecilia Vázquez, entregou este martes as certificacións oficiais da experiencia adquirida aos voluntarios da Asociación Xuvenil Amencer
A directora xeral de Xuventude, Participación e Voluntariado, Cecilia Vázquez, entregou no medio día de hoxe as certificacións oficiais da experiencia adquirida aos voluntarios da Asociación Xuvenil Amencer. En total foron 8 mozos e mozas de entre 18 e 30 anos de idade os que desenvolveron nesta asociación un proxecto de voluntariado xuvenil de apoio ás actividades da entidade, como a preparación e difusión dos fondos da biblioteca ou a dinamización de actividades destinadas aos novos integrantes da asociación. Estas credenciais poderán ser engadidas aos currículos dos mozos.
A Consellería de Política Social achegou 4.300 euros para este proxecto a través do Servizo de Voluntariado Xuvenil, que segundo Cecilia Vázquez é “un programa pioneiro en toda España que conxuga os beneficios da acción voluntaria, como a solidariedade, a sensibilización cos máis vulnerables ou o compromiso coa sociedade, coa importancia que para os propios mozos e mozas ten participar nesta experiencia de educación non formal”.
En 2015 o Servizo incorporou en toda Galicia a 830 mozos e mozas como voluntarios en 128 proxectos de entidades de acción voluntaria e concellos, cun investimento global de 500.000 euros. Na cidade de Ourense o Voluntariado Xuvenil desenvolveu un total de 6 proxectos nos que participaron 37 voluntarios. No que se refire ao total da provincia, os proxectos executados foron 26 e os voluntarios xuvenís 146.
As actividades prioritarias do Servizo de Voluntariado Xuvenil foron as de recuperación da cultura, arte e tradicións populares; as actividades con colectivos en situación de risco, colectivos xuvenís ou relacionadas coa igualdade de xénero; os programas de voluntariado no ámbito familiar e os de colaboración nos trazados xacobeos.
