O portavoz socialista agradeceu a confianza depositada nel despois da elección ante Pachi Vázquez
O gañador das primarias do PSOE en Ourense, o concelleiro José Ángel Vázquez Barquero, avanzou este luns que o seu obxectivo é traballar para recuperar os votantes do seu partido que se declaran indecisos nas enquisas.
Vázquez Barquero, poucas horas despois da súa elección como candidato do PSOE á alcaldía de Ourense, inaugurou unhas xornadas sobre termalismo e turismo de benestar, nas que participa unha delegación do Goberno de Colombia e de profesionais daquel país no sector termal.
Momentos antes da súa intervención, o recén elixido candidato respondeu a preguntas dos xornalistas sobre o resultado das votacións para destacar a grande participación, do 85 por cento dos militantes. "É superior á rexistrada no resto de Galicia e do Estado, onde o habitual é un 70 por cento", indicou.
Nese sentido, felicitou a militancia pola súa "actitude ejemplarizante en todo momento", nun proceso que cualificou de "normal e sen trabas" e agradeceu a confianza depositada nel. En canto ao reconto, sinalou que non asistiu a el e que só sabe que foi "bastante meticuloso e con calma".
Menos votos que avais
Agora, segundo Barquero, hai que mirar "cara a diante" co obxectivo de gañar as municipais "e hai que concentrarse niso e traballar para que se desenvolva con normalidade".
"É de sentido común que o partido ten diferentes sensibilidades, e temos que ter en conta esta realidade e facer unha lista que avalen a maioría dos cidadáns", agregou. Vázquez Barquero impúxose con 237 votos á candidatura do exsecretario xeral do PSdeG e exconselleiro Pachi Vázquez, quen obtivo 199, nun proceso no que quedou descartado o precandidato Javier Rey, por non conseguir o 20 por cento de avais.
En relación ao proceso de primarias do PSOE de Ourense, dáse a circunstancia de que o que foi líder dos socialistas galegos e é actualmente parlamentario autónomico, Pachi Vázquez, obtivo menos votos no proceso deste domingo que avais recollidos antes, pois dos 220 avais da súa precandidatura, lle votaron finalmente 199.
Tamén foron menos os votos recibidos por Vázquez Barquero, respecto aos avais obtidos, pero cunha diferenza menor.
Polos indecisos
Vázquez Barquero referiuse tamén a enquisas propias e publicadas en medios de comunicación, nas que nas que "máis do 64 por cento dos entrevistados non responden ou nas que do 64 por cento dos entrevistados din que están indecisos, que non votarán ou que o farán en branco".
Desa porcentaxe, segundo o candidato, "unha parte moi importante de indecisos está exactamente en votantes do PSOE en 2011 así que hai moito traballo que facer para recuperalos, coa mellor candidatura posible".
Tamén matizou que esas enquisas son "puntuais sobre unha serie de entrevistas" e "hai que darlle o valor que teñen", ademais de que corresponden a un momento no que o proceso de primarias do PSOE non estaba finalizado.
A partir da elección de candidatura, os órganos competentes do PSdeG deberán ratificar o resultado, en poucos días, e xa en 2015 pecharase a elaboración do programa electoral para concorrer ás municipais e as listas.
Nese sentido, Vázquez Barquero non quixo concretar se nas listas irán o outro candidato ou o precandidato, "pois corresponde ao partido elaboralas", pero xa dixo en varias ocasións en actos públicos que non levará imputados e que concorrerán con el unha serie de nomes que, nun 85 por cento, serán diferentes aos do actual Goberno local.
