Participaron preto de medio cento de universitarios de toda Galicia
Preto de medio cento de universitarios e universitarias participaron no Campionato Galego Universitario de Tenis de Mesa, unha iniciativa do Servizo de Deportes da Universidade de Vigo que se disputou no Pavillón de Deportes do Campus de Vigo.
Promover a práctica deste deporte e ser un punto de encontro dos universitarios foron soamente dous dos obxectivos deste encontro que resultou ser todo un éxito xa que se logrou un ambiente perfecto e todos xuntos compartiron unha estupenda xornada de convivencia. Non faltou á cita Eugenio Monge, ex-responsable da sección de tenis de mesa da Universidade e ex-presidente da Federación Galega de Tenis de Mesa, a quen se lle brindou especialmente este evento polo gran labor que sempre fixo a prol deste deporte. O homenaxeado compartiu un xantar cos participantes, pasou o día no campus e non perdeu detalle dos encontros. Monge recibiu varios obsequios conmemorativos do torneo e foi o encargado de entregar algún dos trofeos aos gañadores.
Chegaron ao campionato participantes das tres universidades galegas e houbo premios e recoñecementos tanto para os xogadores federados como para os non federados masculinos e femininos. Na clasificación xeral o primeiro posto foi para a Universidade de Vigo, seguida da de Santiago de Compostela e terceira clasificada a da Coruña.n
