VIDA

Regreso ó pasado co Camiño de Nós

O roteiro cultural “Camiño de Nós (1926-2022)”, organizado pola Fundación Insua dos Poetas e patrocinado pola Deputación de Ourense, volveu reunir a ducias de participantes co fin de poñer en valor a cultura tradicional dos camiños.

O punto de partida escollido para este ano situouse no Carballiño, no inmoble da rúa Tomás María Mosquera que acolleu o xa desaparecido Hotel Carlos, onde o 8 de xullo de 1926 pernoitaron os cinco persoeiros da Xeración Nós: Vicente Risco, Ramón Otero Pedrayo, Lois Feixóo, Antón Sánchez e Xavier Pardo. Minutos antes do inicio da ruta, descubriuse nese punto unha placa conmemorativa sobre o “Camiño de Nós”.