Xornal Escolar

As clases do futuro

Moitas veces pensamos que algunhas cousas as aprendemos só para aprobar unha asignatura e non somos conscientes da súa aplicación práctica na vida diaria. Pásanos, por exemplo, coas matemáticas. Pero, sabías o importantes que son para que un voo chegue dende a orixe ó seu destino sen problemas? Porque pilotar un avión non só consiste en despegar e aterrar, senón que antes os pilotos teñen que trazar un plan fixándose nas coordenadas, a curvatura da terra, o vento que haxa ese día… 

De todo isto poden aprender os escolares de toda Galicia na Aula Newton, recén inaugurada na Tecnópole. O obxectivo final da iniciativa non é outro que espertar as vocacións científicas e tecnolóxicas entre o alumnado de Secundaria e Bacharelato. Divididos en grupos, os participantes traballan sobre un mapa xusto antes de que chegue o momento máis agardado: probar o simulador de voo. Porque a Aula Newton está equipada coa máis novidosa tecnoloxía para convertir ós mozos en expertos pilotos. 

Mentres, noutra aula, os seus compañeiros encárganse de construír e voar un dron, un elemento cunhas aplicacións infinitas e sobre o que demostran ter unhas destrezas moi amplas. Agora a iniciativa, deseñada por expertos educativos de Noruega, agarda ós escolares para demostrarlles que eses números e símbolos que aprenden nas aulas teñen unha función moi importante na vida diaria.