Xornal Escolar

Como se curan os disgustos?

Empoderar ós máis pequenos no seu autocoidado e capacitalos para que saiban como actuar ante unha emerxencia e situacións do día a día. Así é como se presenta o obradoiro “Pupas, sustos e outros disgustos”, que leva varios anos percorrendo os centros educativos de toda a provincia para explicarlle ás novas xeracións como actuar ante accidentes cotiáns e, ó mesmo tempo, conciencialos sobre a importancia do bo uso dos servizos sanitarios.

Nesta ocasión, a actividade, promovida por profesionais da Enfermaría de Atención Primaria, chegou ó colexio Manuel Sueiro de Ourense. Alí, alumnos de Primaria tiveron que aprender a curar moratóns, cortes, feridas… E tamén a reanimar ós seus bonecos, cos que chegaron para converterse nuns expertos na resolución de emerxencias e accidentes. 

Despois dun curso centrado nos protocolos sanitarios da pandemia, este ano o obradoiro “Pupas, sustos e outros disgustos” voltou ás esencias da súa orixe, coas que leva percorrendo tódolos recunchos da provincia durante todo o curso. O obradoiro ten ademais unha gran acollida entre o alumnado, que aprende valores dun xeito práctico e divertido.