Xornal Escolar
Compartir o hábito lector en Salesianos
Unha vez ós mes, as aulas do colexio Salesianos acollen a reunión dunha trintena de alumnos de Educación Secundaria, que se xuntan para compartir as súas impresións e experiencias de lectura. É o clube Tragalibros, unha iniciativa para fomentar os hábitos lectores entre o alumnado que un ano máis é un éxito de convocatoria. Ademais de ler, realizan actividades como a creación de marcapáxinas ou relatos para os máis cativos do colexio.
“Cando sangren os lobos” é o título do libro que agora remataron os participantes e todos compartiron unhas impresións moi positivas da súa lectura. Para eles, participar no clube significa gozar moito máis da lectura, ó poder poñer en común as sensacións que cada un foi tendo.
As súas personaxes favoritas, os momentos máis intensos do libro ou mesmo as interpretacións que cada un fixo do final da historia centraron algúns dos momentos do seu encontro mensual, no que participaron lectores veteráns e outros que se adscribiron á iniciativa este curso. A implicación é moi grande por parte do alumnado, maioritariamente feminino.
Agora, unha vez celebrada a súa reunión mensual, afrontan este novo ano con moitas ganas de ler e xa teñen deberes ata o vindeiro mes, cando os Tragalibros volverán ó seu encontro para compartir o seu amor pola lectura.
Fotos: Xesús Fariñas