A horta, lugar de aprendizaxe no Manuel Sueiro

Despois do éxito da primeira edición da horta colaborativa dos centros educativos CEIP Manuel Sueiro e CIFP Portovello, en colaboración co seu profesorado e alumnado, a actividade retomouse este ano cunha pequena plantación de produtos hortícolas que xa medran no espazo que o segundo puxo a disposición dos alumnos do Manuel Sueiro no exterior das instalacións.

Pero antes de comezar a sementar é importante dispoñer das prantas, así que a primeira parada foi en Agrolimia, onde os alumnos recompilaron o material preciso para a actividade. Entre todos e todas foron recollendo os productos. Deste xeito, os alumnos tiveron que calcular os importes e aboar a conta poñendo en práctica os seus coñecementos de cálculo -aínda que tiveron algunha rebaixiña-.

Con todo o material xa nas mans, dirixíronse á horta do Portovello, para comezar a prantación seguindo tódolos pasos: preparar a terra retirando pedras e malas herbas, incorporar e remover o abono, sementar tomates, leitugas, cenouras, cebolas e fresas, e comezar a rega con coidadiño. Unha vez ás semana, estes novos agricultores visitan a horta para facer o mantemento e seguir a evolución das colleitas. Xa só lles queda agardar para poder degustalas todos xuntos na aula e comezar a pensar nas sementes do próximo ano.