Xornal Escolar
As mañás máis divertidas son as de Amencer
O Nadal en Ourense ten varios clásicos dentro da súa programación e un deles son as Mañás de Amencer, un proxecto que pretende educar en valores a través do xogo, favorecer a creatividade dos cativos, a participación e o traballo en equipo, e poder seguir empregando as instalacións colexiais fóra do horario escolar.
Do mesmo xeito, tamén se trata de ofrecer unha proposta de conciliación familiar e laboral durante as vacacións escolares para as familias da cidade, ofrecéndolles ós cativos actividades como animación á lectura, obradoiros, psicomotricidade, deportes, novas tecnoloxías, ludoteca, xogos organizados, termas, visita á biblioteca, excursións...
Unha chea de propostas que converteron as Mañás de Nadal un ano máis nun divertido espazo de convivencia para nenos e nenas de tódalas idades. Xuntos desenvolveron todo tipo de xogos colaborativos e tamén tiveron tempo para visitar lugares como Pazolandia ou a pista de xeo do centro comercial Ponte Vella.
Este ano a proposta da asociación xuvenil Amencer cumpriu o seu 15 aniversario, recibindo a 149 nenos e nenas de entre tres e 14 anos nas dúas seccións de Infantil (62 participantes) e Primaria (87 participantes) acompañados por 16 animadores e animadoras. En total 165 persoas implicadas nesta tradición das vacacións.