O mundo que non vemos en Mariñamansa
Para conmemorar o Día da Muller e a Nena na Ciencia, o colexio de Mariñamansa organizou unha divertida actividade que foi un éxito entre o alumnado. Co obxectivo de fomentar as vocacións científicas entre as nenas, desta volta centráronse en coñecer o mundo dos microorganismos, hixiene, alimentos... Para iso, usaron placas petri para cultivar nelas microorganismos das nosas mans, pés, boca, axilas, mans lavadas, lacrimal... E coa axuda da relatora, coas colonias de microbios xa grandes, identificamos se alí medraran fungos ou bacterias.
No propio día da actividade fixeron un kahoot por equipos sobre o tema, cata de olores, iogur que comeron hoxe, aproveitando que estamos na semana dos Lácteos. O alumnado de infantil ademais fixo pan. Todo isto coordinado pola Unidade de Cultura Científica da Universidade de Vigo, coa investigadora en Bioloxía Alicia Pérez, doutorada en Ciencia e Tecnoloxía Agroalimentaria.
A temática da charla foi “O mundo que non vemos” e tivo como obxectivo iniciar ao alumnado no mundo da microbioloxía a través do emprego de técnicas básicas no laboratorio, como é a observación co microscopio, o crecemento de microorganismos en placas de cultivo e a realización de fermentacións. Todo para comprender ata que punto a ciencia está presente en tódolos eidos das nosas vidas.
