Xornal Escolar
É tempo de vendima no Cardenal Cisneros
Manter as tradicións é moi importante para os centros educativos, que queren que as novas xeracións coñezan as tarefas cotiás dos seus antepasados. E cada mes ten as súas. A chegada do outono significa que chegou tamén o tempo de recoller as uvas e prepararse para facer viño. Igual que antigamente cada casa tiña os seus propios acios, no colexio Cardenal Cisneros converteron a aula de Educación Infantil nunha particular viña e os cativos en pequenos viticultores.
Durante un día, un grupo de alumnas e alumnos de Educación Infantil recrearon unha xornada de vendima, unha proposta incluída no proxecto de posta en valor dos oficios tradicionais da provincia.
Para levar a cabo os labores do campo, achegouse ó centro un anaquiño de esta actividade que, sendo común no rural, para a maioría dos rapaces da cidade e os chegados do estranxeiro convértese nunha novidade.
Así, unha videira "deu froito" con acios que os nenos e as nenas vendimaron. Algúns non perderon o tempo e xa foron catando os froitos mentres outros compañeiros recreaban a tarefa da pisa da uva para a obtención do mosto. Ó final, as vendimadoras e vendimadores probaron o resultado do seu traballo compartindo unha merendiña, igual que antigamente se facía nunha tarefa na que tamén se gozaba da convivencia entre veciños e familiares.