CC.OO., UGT, CSIF e CIG móstranse 'abertos' a negociar coa Consellería de Medio Rural unha reestruturación do Servizo Público de Defensa Contra Incendios Forestais (SPDCIF), pero censuran o 'globo sonda' co que, interpretan, o departamento trata de 'medir' a postura das organizacións sindicais ante futuros cambios no número de membros e no sistema de quendas e libranzas das brigadas.
En declaracións a Europa Press, responsables da área de Administración autonómica das catro centrais critican ter constancia 'pola prensa' da intención da consellería de introducir modificacións no SPDCIF, que pasan pola redución de sete a cinco do número de compoñentes de cada cuadrilla e a adopción conxunta dos días libres -os cinco empregados á vez-.
Pola súa banda, a Consellería de Medio Rural remite ás declaracións feitas este luns e reitera que 'está a traballar' nun borrador 'para tratar de reformar' os actuais sistemas de quendas e libranzas. 'Calquera formulación se fará consensuado cos traballadores, os cales, de feito, están a participar no proceso de elaboración do estudio', asegurou o departamento.
'O novo modelo que parece que pretenden, polo que vimos nos medios, dende logo non está apoiado por unha grande maioría dos técnicos do servizo, que non o ven operativo', subliña a Europa Press o presidente do sector autonómico de CSIF, Juan Carlos Rivas. Esta central foi a primeira en reprochar, mediante un comunicado remitido tamén o luns, as 'formas' da consellería ao facer pública a súa intención.
MINORACIÓN DO PERSOAL E MOBILIDADE FORZOSA
Rivas cualifica a actitude de Medio Rural de 'irresponsable' e advirte de que, calquera novidade que implique 'precarizar' o servizo mediante a minoración do persoal e a mobilidade forzosa se vai topar co seu 'rexeitamento absoluto'. 'As indagacións que fixemos apuntan ao camiño das amortizacións de praza e á obriga de cambios de localidade', incide, para sentenciar: 'Fronte a iso vannos atopar'.
Ao respecto do procedemento seguido pola Xunta, o sindicalista di que 'non é certo' que convocara os representantes dos traballadores, algo polo que 'están a esperar'. Pola contra, apunta á consultora Eosa como a posible encargada de elaborar un informe a partir de reunións celebradas con empregados agora 'hai un ano e nas que a empresa lles preguntaba cuestións laborais como os seus horarios.
'Contrátase unha consultora, fai unhas reunións e dá as conclusións que quere ao que paga', conclúe, para denunciar que os devanditos estudios son 'mercenarios'.
Pola contra, CSIF antepón a calquera revisión do funcionamento do SPDCIF cuestións 'urxentes' como a 'eliminación do quiosco Seaga' -sociedade pública creada polo Goberno bipartito para o desenvolvemento de tarefas agrarias-, a contratación dos efectivos de verán a través das listas oficiais da Xunta, a prolongación de 9 a 12 dos meses de contrato do persoal fixo-discontinuo e melloras nuns equipos materiais 'bastante obsoletos'.
'QUE NON VEÑAN CON MILONGAS'
Por parte de CC.OO., Benxamín Vences coincide en criticar que o seu sindicato 'non ten constancia oficial de nada'. 'Se a consellería ofrece diálogo, non empeza ben', opina.
Ao igual que Rivas, reclama a disolución de Seaga e que a contratación de efectivos para as campañas estivais se realice a partir das listas oficiais. Así mesmo, pide á consellería 'que non veña agora con milongas' porque CC.OO. leva 'esixindo dende hai tres anos' a apertura da mesa de negociación para abordar unha 'reorganización' que vai 'necesaria' coa finalidade de facer o servizo 'máis eficaz'.
'Teño moitas dúbidas de que de aquí ao verán se poida avanzar moito', interpreta Vences, quen, iso si, indica que a consellería lles comunicou a reincorporación o próximo luns, día 14, dos 610 traballadores fixos-discontinuos. 'Levaban tres meses no paro, cando deberían estar a desenvolver labores de prevención', avisa.
POSTURAS ATOPADAS DOS SINDICATOS
Fronte a isto, o responsable da Federación de Servizos Públicos da UGT, José Francisco Núñez, critica a CSIF e CC.OO: 'Fainos graza que digan que se van opoñer a estes cambios na mesa de negociación -apunta-, porque o SPDCIF se asinou en 2006 e eles non o aprobaron'. 'Agora resulta que o acordo é moi bo', ironiza.
Con todo, Núñez tamén mostra 'desconfianza' ante os movementos da consellería e apraza ata o momento en que lles convoque calquera valoración sobre o contido da súa proposta. 'Somos un sindicato razoable que quere acordos, pero necesitamos argumentos', aduce.
CONVENIO COLECTIVO
Por último, e por parte da CIG, o secretario da sección de Autonómica da central nacionalista, Fernando García, evidencia o fatal' que lle parecen 'as formas' de Medio Rural e advirte de que 'os mínimos contidos' que coñece 'non proceden'.
'Hai un convenio colectivo que é o que establece o sistema de quendas e libranzas', asevera, para incidir en que a CIG non permitirá 'que se altere o pactado' e, de ser necesario, levará a cuestión 'aos tribunais'. 'Estamos dispostos a sentar, pero sempre para mellorar o sistema', apostila.
Así, García expresa sospeitas tamén acerca da posibilidade de 'enmascarar' un 'aforro' de persoal extra -o de verán- mediante a redución do número de membro das brigadas. 'Se se baixa de sete a cinco, con ese excedente, ¿que se vai facer? ¿Formar novas brigadas?', pregúntase. 'Estariamos en contra', recalca
