O PP considera necesaria unha ordenanza que defina claramente o tipo de vehículos que poden aparcar
O grupo municipal do Partido Popular insta ao goberno socialista de Ribadavia a convocar aos grupos municipais para redactar dunha ordenanza reguladora do uso da área de autocaravanas que deberá someterse á aprobación do pleno municipal, ao máis tardar, na vindeira sesión ordinaria do mes de maio. Segundo o voceiro do grupo popular, César Fernández, “unha vez que desde o goberno municipal nos comunicaron que se ía celebrar unha inauguración oficial desta área a finais de maio, entendemos que non debe demorarse a redación dunha ordenanza que regule o uso desta área.
Estamos a falar dunha ordenanza que defina claramente o tipo de vehículos que poden utilizar a área, os prazos máximos de permanencia na mesma, e unha serie de normas básicas como a imposibilidade de estacionar ocupando as zonas destinadas a manobra ou a vaciado de depósitos, así como as sancións que correspondería impoñer a quen faga un uso indebido".
O concelleiro César Fernández salientou que “a existencia dunha ordenanza reguladora deste espazo contribúe a aportar seguridade xurídica ao Concello, pois regula o uso e establece o réxime sancionador do incumprimento deste uso, pero tamén outorga seguridade xurídica aos usuarios, xa que lles permite coñecer de primeira man os seus dereitos e as súas obrigas coma usuarios desta área".
A ordenanza tamén evitará o estacionamento doutro tipo de vehículos nesta área. "É de urxente necesidade pois xa na Semana Santa puidemos ver como nesta área chegaron a estacionar turismos con remolque caravana e cabezas tractoras de trailer, e ata chegamos a ver como se abandonaron electrodomésticos”, sinala.
