Participarán na Ruta do Viño, que este ano contará con tres liñas de autobús
A Ruta do Viño do Ribeiro celebra a IV edición das Xornadas de Portas Abertas durante os días 6 e 7 do vindeiro mes de xuño, aportando un programa repleto de actividades enoturísticas para todos os públicos e coa importante novidade do ViñoBus Ruta do Viño do Ribeiro.
Esta actividade está promovida pola Axencia de Turismo de Galicia e ten como finalidade facilitar o desprazamento ao público potencialmente interesado en asistir a estas xornadas, para o que se dispón de catro liñas de autobuses que sairán dende Ourense, Vigo e Ribadavia, pasando por os distintos concellos da comarca do Ribeiro.
Cada unha destas foi deseñada de xeito que as persoas participantes poidan coñecer a variedade de recursos que ofrece a ruta, visitar as diferentes adegas que están incorporadas á mesma, así como coñecer a riqueza patrimonial e cultural do territorio ou descubrir as peculiaridades dos servizos turísticos que ofrece.
Adegas participantes
Nesta edición da Ruta do Viño do Ribeiro participarán preto de 20 adegas, que poderán ser visitadas ao longo das dúas xornadas, incorporándose tamén á mesma varios aloxamentos rurais. Así mesmo, están previstos desprazamentos a lugares de interés patrimonial e monumental, como Pazos de Arenteiro, ou as Termas de Prexigueiro, entre outros.
Se o ano pasado superáronse os 200 visitantes, a organización espera aumentar considerablemente no vindeiro mes de xuño a participación, logo da incorporación do novo servizo de autobuses.
Os socios da Ruta do Viño do Ribeiro implicáronse nesta celebración para ofrecer actividades para todos os públicos, familias, grupos e parellas, ofrecendo prezos especiais nos aloxamentos así como paquetes turísticos con desprazamentos desde A Coruña e Santiago de Compostela.
O día 6 de xuño, ás 20,00 horas, na Igrexa da Madalena de Ribadavia, o público poderá degustar máis de vinte marcas de viño das adegas adheridas á Ruta do Viño do Ribeiro, contando tamén cun grupo musical.
Eses mesmos días do mes de xuño haberá tamén ruta de Portas Abertas nas Rías Baixas, e o 30 e 31 de maio, en Valdeorras, Ribeira Sacra e Monterrei.
