A área sanitaria de Ourense, Verín e O Barco rexistrou onte unha redución do ritmo de contaxios. Na última xornada, Sanidade contabilizou 86 novos casos de coronavirus na provincia, o que, tralas altas de pacientes, supón que os contaxios activos totais son 1.482, oito máis que o día anterior.
O número de persoas curadas na provincia desde que se iniciou a pandemia ascende a 3.095, 75 máis que a xornada anterior. Por segundo día consecutivo, non se rexistraron falecementos en Ourense. O número de mortes por covid desde o inicio da pandemia mantense en 166 na área sanitaria.
Os hospitalizados aumentan nunha persoa en Ourense: hai 56 pacientes ingresados en planta -un máis que o pasado sábado- e 10 permanecen na UCI.
A cifra de PCRs realizadas segue á alza para detectar posibles casos positivos. Segundo o último parte do Sergas, fixéronse 1.108 tests máis que a xornada anterior. O número de PCR feitas na área sanitaria de Ourense, Verín e O Barco ascende a 71.353. En canto as probas serolóxicas, realizáronse xa 59.893, 252 máis desde o sábado.
En canto aos datos galegos, o número de casos activos de coronavirus en Galicia rexistrados onte é de 4.379, deles 745 son da área da Coruña, 462 da de Lugo, 1.482 da de Ourense, 507 da de Pontevedra, 464 da área de Vigo, 597 da de Santiago, e 122 da de Ferrol. En Galicia hai un total de 21.713 persoas curadas. Onte producíronse catro novos falecementos en centros hospitalarios. Trátase de dous homes de 59 e 74 anos, que estaban ingresados no CHUAC, e dúas mulleres de 83 e 88 anos no CHUS.
