O Museo da Gaita de Fol divulgará a historia deste instrumento e pretende servir de motor turístico
O Concello de Barbadás disporá desde mañá do primeiro espazo museístico da localidade, coa inauguración do Museo da Gaita de Fol, un lugar para a divulgación da historia deste senlleiro instrumento, que servirá de "motor turístico" para o municipio, segundo destacou o tenente de alcalde, Xosé Manuel Fírvida.
No acto de presentación de onte no Liceo, Fírvida estivo acompañado por Paulo Gonçalves, creador intelectual do espazo, e Montse García, a xestora desta nova infraestrutura. "A inauguración do primeiro museo será un día especial e histórico para Barbadás", destacou Fírvida, quen se mostrou satisfeito de que a antiga Casa da Música, onde se albergará este museo, "vai cumprir a función para a que foi deseñada".
O acto de inauguración será mañá ás 20,00 horas, nas instalacións situadas na rúa A Carreira, número 14, na parroquia de Barbadás. No evento de apertura haberá actuacións musicais e petiscos para os asistentes.
O Museo da Gaita de Fol contará con actividades e visitas programadas, e quen o desexe visitar pola súa conta poderá reservar a data no teléfono do Concello de Barbadás.
Fírvida destacou que é un museo "en construción", porque aínda está "por encher" con, entre outras cousas, un obradoiro de creación de instrumentos tradicionais.
Paulo Gonçalves: "A gaita de fol ten unha historia moi descoñecida"
Que diferenza este museo doutros que tamén versan sobre a gaita?
En Ourense temos o Museo da Cornamusa, que é obxectual, e que mostra grandes pezas. Pero o obxectivo neste caso non é tanto mostrar só obxectos, senón dar a coñecer a historia do instrumento e da música tradicional e erudita.
Era necesario este espazo?
O motivo é evidente. A gaita de fol é un instrumento que, para ben ou para mal, define o noso país. Só isto xa xustifica a creación dun museo así.
Coñecemos a orixe da gaita de fol?
É un instrumento tradicional cunha presenza social que é xigantesca, pero cunha historia moi descoñecida. n