Elena Rivo: “Traballarei para toda Galicia, pero sen esquecerme de Ourense, a miña provincia”

Elena Rivo (Ourense, 1971) tivo unhas horas para darlle o “ok” ao presidente da Xunta, Alfonso Rueda, que lle ofreceu o posto de conselleira de Promoción do Emprego e Igualdade. Aceptou e o pasado 13 xuño converteuse na segunda representante ourensá no actual goberno galego, xunto a José González, de Medio Rural. Houbo quen lle cuestionou que facía unha académica no posto. Rivo, ata hai unhas semanas vicerreitora do Campus de Ourense, é experta en empresa. Dirixiu no ámbito universitario unha cátedra de Empresa Familiar, foi decana de Empresariais… pero ademais sabe o que é tomar decisións nunha empresa familiar tan coñecida en Galicia como Aceites Abril. Tamén estivo metida en política, como concelleira do goberno de Manuel Cabezas. Atende a súa primeira entrevista no seu novo despacho, que en tamaño é similar ao que tiña no Campus, só que agora ten máis ollos sobre ela, nun edificio situado na capital galega. Confesa que seguirá vivindo en Ourense. Que chamada recibe e como acepta o cargo de conselleira de Promoción de Emprego e Igualdade? É un reto ilusionante, cando traballei como concelleira en Ourense e como vicerreitora sempre dixen que é unha honra traballar para o goberno de Galicia. Recibín a chamada do presidente da Xunta e tiven unhas horas para pensalo, pero afróntoo con moita ilusión e responsabilidade. Foi complicado deixar o Campus? Pois si, estaba moi a gusto. Tiñamos moitos retos que afrontar, pero agradezo a xenerosidade do reitor e dos equipos. É unha gran responsabilidade que me deixaran marchar. O meu substituto, Javi Rajo, vaino facer moi ben. Que retos ten como conselleira? O emprego abre as portas do benestar, temos que loitar por conseguir un emprego de calidade. O que xera realmente emprego son os empresarios e empresarias. Contribúen ao fomento do emprego e a xerar riqueza en Galicia. Como administración, o que temos que facer é non poñer trabas, fomentar axudas e facilitar trámites. Creo que temos un empresariado galego moi comprometido coa terra. Temos os polos de emprendemento, unha ferramenta que trataremos de visibilizar máis. No eido da Igualdade é loitar por esa igualdade real, que aínda que se traballa moito non a acadamos. E como ourensá, traballo para toda Galicia pero tentarei que as oportunidades, que Ourense ten moitas, se convirtan en realidade. Traballarei para toda Galicia, pero sen esquecer a Ourense. Fala rural, de que é ourensá... Cre na discriminación positiva? Territorios como Ourense e Lugo precisan un pulo maior por parte da súa consellería? De feito, os polos de emprendemento estableceránse no rural. A fixación de poboación é importante en Galicia e cremos que estes polos e a xeración de maior emprendemento, tamén no rural, é fundamental. Como vicerreitora do Campus dicía que o reto era que os alumnos entraran rápido nas empresas. Agora ten a oportunidade de dirixir unha consellería de emprego. Que pode facer polo emprego xuvenil en Galicia? O máis novidoso que temos neste momento son os polos de emprendemento e a modernización das oficinas de emprego, así como a formación á carta. Está a punto de poñerse en marcha unha nova forma de oficinas de emprego onde utilizaremos intelixencia artificial para captar eses perfís. Por exemplo, quero ser transportista na zona vitivinícola, pois casar as necesidades que teñen as adegas de transportar o viño e a querencia do transportista. Hai que axudar desde a casación da demanda real do traballo coas ofertas reais. Nestes polos de emprendemento terán peso os territorios máis discriminados tradicionalmente? Si. Xa están oito polos en funcionamento, en Ourense son dous. Proximamente haberá sete máis en Galicia. O Plan retorna é importante? Pódese seguir fiando a recuperación da economía galega ao regreso dos emigrantes? Eu penso que é moi importante, porque os emigrantes marcharon de Galicia cando non habia oportunidades. Están retornando moitos con investimentos, e outros teñen as capacidades que podemos aproveitar aquí. Temos un país envellecido e necesitamos talento, desde a consellería podemos axudar, non só a retornar, senón a facilitar formación para incorporarse ao mundo laboral ou para casar as necesidades co talento. Cre que hai sectores nos que ninguén quere traballar? Non o penso. Quizais o agroalimentario, que pode ser máis duro, está collendo pulo. Cada vez necesítanse maís enxeñeiros. A pandemia deulle un pulo ao rural e a xente está apostando por el, non só a nivel de vivenda, senón de negocio. Por iso os polos son tan importantes. As patronais repiten que hai sectores nos que non atopan profesionais. Que se pode facer? Esta renovación na que imos poñer as oficinas de emprego no século XXI, vai ser unha ferramenta moi potente que estará en marcha en breve. Iso, xunto coas novas iniciativas que aprobamos, as microcredenciais, que veñen dunha corrente europea. Ata agora era formación reglada con certificado, agora calquera traballador sénior pode formar aos júnior e págase parte do custe mentres están en formación. En Igualdade, que pretende? Hai varias iniciativas que manteremos e aínda proporemos máis. Ningún galego debería ser atacado ou discriminado por temas de xénero, orientación sexual ou discapacidade. Que tipo de medidas lle gustaría impulsar? No tema de xénero, Galicia ten mulleres referentes. Marta Ortega, Carmen Lence, Adriana Domínguez, María Gómez-Franqueira, Braulia Froiz... Hai moitas mulleres que lideran a nova xeración empresarial, polo tanto hai un cambio na foto, sen discriminar a ningun home. Ter referentes empresarias que poden facelo ben e que todo o poden, axuda para mellorar o emprendemento feminino. Igualdade é un área máis desfavorecida ou desatentida polas administración? Penso que non, foi tratada con moito agarimo. Pero todo se pode mellorar. Emprego e Igualdade vanse fusionar nos seus plans? Si. A igualdade ten que estar en todos eidos. É importante Emprego e Igualdade porque o emprego abre as portas do benestar, que conleva igualdade real. Cal sería a súa gran medida como conselleira? Conseguir unha das maiores cotas de emprego de calidade e unha igualdade real. A provincia de Ourense vai estar na mesa do seu despacho? Non quero discriminar a ninguén en Galicia, pero eu son ourensá e teño esa querencia por Ourense, sen perxudicar a ningunha provincia. Que pode aportar o seu perfil a esta consellería? Algún preguntaba: “E que fai unha académica nesta consellería?”. Pois para os que non me coñezan, eu estiven na política, primeiro estiven no ámbito privado, nunha entidade financieira, despois colaborei na empresa familiar, despois estiven en politica, en xestión da universidade... Creo que esa mestura académica e empresarial enriquece as perspectivas e podo aportar unha visión conxunta nesta consellería. Como leva no persoal este cambio de vida? É unha honra e espero estar á altura. Agradezo á miña familia, a meus fillos, a meus pais e á miña familia política porque sen o seu apoio sería moi difícil.