A intelixencia artificial permite agora optimizar a diagnose de enfermidades mediante raios X. É o resultado dun equipo de investigación da Universidade de Vigo radicado no Campus de Ourense. A ferramenta chámase Sadisir, o acrónimo de “Sistema de Automatización de Diagnose a partir de Signos Radiolóxicos”. A través da combinación de técnicas de intelixencia artificial e modelos de aprendizaxe automática, o sistema conclúe unha ou varias diagnoses médicas, as máis probables, a partir dos signos presentes na imaxe de raios.
A ferramenta foi desenvolvida no marco do grupo Sing (Next Generation Computer Systems Group, Grupo de Sistemas de Ordenador de Seguinte Xeración en galego) da UVigo. O proxecto foi dirixido por David Ruano e nel participaron os investigadores Tomás Cotos, Silvana Gómez e Reyes Pavón, así como Diego Domínguez e José Manuel Fernández-Carrera, médicos do Complexo Hospitalario Universitario de Ourense.
“No campo da medicina, a interpretación precisa de signos radiolóxicos é fuindamental para o diagnóstico eficaz de enfermidades. Con todo, a abafadora cantidade de datos radiolóxicos desafía a capacidade dos profesionais da saúde para analizalos exhaustivamente”, explican dende o equipo. Por iso a intelixencia artifical cobra importancia á hora de axudar aos profesionais sanitarios. Sadisir, segundo detallan, foi adestrado con 160.000 radiografías de tórax e información clínica sobre 67.000 pacientes, datos que axudan á ferramenta a estimar un diagnóstico probable. Iso si, a última palabra tena sempre un médico.
