Iria Vázquez: "A pandemia non foi só sanitaria, tamén tivo un compoñente social importante"

Iria Vázquez, profesora de Socioloxía do Campus de Ourense, é unha firme defensora do papel da investigación na mellora da sociedade. Forma parte do equipo organizativo do XVI Congreso de Antropoloxía, que reúne dende hoxe e ata o venres a un total de 700 especialistas na materia, nacionais e internacionais. O encontro permitirá poñer enriba da mesa algúns dos principais retos sociais do contexto actual, tanto en España como en Portugal e Latinoamérica. Detrás do evento está a Asociación Galega de Antropoloxía (Agantro), a Asociación de Antropoloxía do Estado Español (Asaee), as tres universidades galegas, o Consello Superior de Investigacións Científicas (CSIC) e a Universidade de Trás-os-Montes e Alto Douro de Portugal. Que temas se abordarán? Hai moitas temáticas, xa que haberá sobre 40 simposios diferentes. Pero pódese dicir que o fío é repensar as crises sistémicas como a medioambiental, a covid, as desigualdades, o poder, o feminismo, as identidades… Haberá oco para escoitar a realidade doutros lugares. Si. Por exemplo, a sesión de inauguración está protagonizada por Rossana Reguillo, antropóloga mexicana, que falará da situación política do seu país e do uso da violencia nos contextos urbanos. Na sesión de clausura falará outra antropóloga, Astrid Ulloa, de Colombia, que abordará cuestións indíxenas e feministas. Tamén se falará de Galicia? Claro. Haberá unha mesa adicada a antropoloxía en Galicia e Portugal. Ademais, a profesora Belén Fernández da Coruña e eu organizamos un simposio sobre o fluxo migratorio galego no pasado e no presente. Abordamos as vagas do século XIX e XX, pero tamén a terceira vaga, a actual, na que moitos galegos tamén están marchando fóra, sobre todo a Francia, Alemania e Inglaterra. A antropoloxía permite entender o presente? Facilita ferramentas para reflexionar sobre o pasado e o presente, comparar distintas sociedades en distintos momentos históricos, tecer diálogos entre disciplinas sobre fenómenos sociais… a antropoloxía é esencial. Por exemplo, a pandemia da covid non foi unicamente sanitaria, tamén tivo unha compoñente social moi importante: houbo que valorar cuestións de xénero ou de desigualdade económica. Que se está facendo na comunidade nesta ciencia social? Estase facendo moito. Agantro, pola súa parte, fai cursos de formación, congresos, acabamos de facer unha investigación sobre o baile e a música galega… E as tres universidades están esforzándose máis que nunca en divulgar os estudos que fan.