A asemblea electoral celebrarase o próximo 15 de xaneiro en Santiago con dereito a voto de máis de 200 persoas
A Confederación de Empresarios de Galicia (CEG) aprobou este venres as candidaturas do presidente dos empresarios de Ourense e conselleiro delegado de Aceites Abril, José Manuel Pérez Canal, e do presidente da Asociación de Empresas de Formación de Ourense e director dun colexio de Formación Profesional, Antonio Dieter, para optar a liderar esta institución dende o próximo 15 de xaneiro.
En declaracións á prensa, o líder dos empresarios coruñeses, Antonio Fontenla, como voceiro da CEG tras a marcha de José Manuel Fernández Alvariño --que desembocou na celebración eleccións anticipadas-- explicou que unha reunión conxunta de comité executivo e xunta directiva deu luz verde a estas dúas candidaturas que "cumpren todos os requisitos", nunha xornada na que ambos os dous aspirantes avogaron por "superar diferenzas do pasado".
Este venres, pechouse o prazo para presentar candidaturas co apoio público dos empresarios de Lugo (CEL) a Pérez Canal, que tamén conta co respaldo a Confederación de Ourense, que preside. Pola súa banda, Antonio Dieter conta co aval a Federación Autonómica de Centros de Ensino privado (CECE-Galicia) e a Federación Galega de Empresas de Formación (CECAP-Galicia).
Así, a asemblea electoral celebrarase o próximo 15 de xaneiro (ás 12,00 horas) en Santiago con dereito a voto de máis de 200 persoas. De tal forma, A Coruña é a provincia con máis sufraxios (40), seguida de Pontevedra e Lugo (ambas as dúas con 32) e Ourense (30). O resto de votos son de sectoriais, con máis de 70 sufraxios.
Previamente, ese 15 de xaneiro, ás 11,00 horas haberá unha asemblea na que se aprobará a modificación dos estatutos para incluír o código ético, así como a posibilidade de moción de censura ao presidente.
PROXECTO DE PÉREZ CANLE
Así, Pérez Canal afronta este proceso "con moito optimismo" en favor dunha "nova etapa" da CEG para "superar as diferenzas do pasado", onde se primen os "servizos de alto valor engadido" para os empresarios galegos.
Neste sentido, Pérez Canal aposta por un plan estratéxico a catro anos vista, cun plan director consensuado con provincias e sectoriais. "Non quero unha CEG presidencialista, senón participativa entre todos", deixou claro.
Como medidas a seguir, é partidario de proxectos "innovadores" e "transfronteirizos", con papel principal para a "internacionalización" e os "novos empresarios", ao tempo que chama ao "diálogo social".
Ademais, avoga por un código ético baseado no que aprobou o ano pasado na provincia de Ourense, "con transparencia" tanto económica como "nas contratacións internas".
Sobre os apoios cos que conta, Pérez Canal sinalou que "se fala moito, pero aínda queda unha semana de campaña", con "bastantes reunións e entrevistas" coas confederacións provinciais e asociacións. "Preséntome porque creo que teño bastantes posibilidades de gañar as eleccións", asegurou.
Xunto a iso, Pérez Canal chamou a "traballar unidos", gañe quen gañe, pois "hai cordialidade ao respecto" e está "disposto" a "colaborar todos xuntos".
PROXECTO DE DIETER
Pola súa banda, en declaracións a Europa Press, Antonio Dieter subliñou que espera con "ilusión" e "ansiedade" as eleccións do próximo 15 de xaneiro, pero avisa: "Evidentemente preséntome para gañar".
"En todo caso, se gaño, o outro candidato terá a miña man tendida; se perdo, tendereille a miña man ao outro candidato para loitar en favor dos intereses da CEG", remarcou.
Sobre os apoios cos que conta, Dieter Moure sinalou que "parece que van ser unhas eleccións moi disputadas", pero di "ter apoio nas catro provincias e das sectoriais". Para iso, realizará unha campaña centrada nas provincias de "A Coruña e Pontevedra", despois de que Lugo "se pronunciase maioritariamente" a favor de Pérez Canal.
"Se hai unha candidatura de renovación é a miña, porque son novo no mercado, a outra candidatura é continuista, porque era o vicepresidente que tiña o anterior presidente, é máis do mesmo", defende Dieter fronte a Pérez Canal. "Se hai unha candidatura de renovación é esta, porque renovarse para pasar do chanzo de abaixo ao de máis arriba non parece axeitado,", incide.
As medidas que pode avanzar Dieter pasan por unha "reforma de estatutos profunda" para dar máis presenza a sectoriais, polígonos industriais e novos empresarios que "teñen moito que dicir", tamén traballará na "incompatibilidade" de cargo para que "un presidente provincial non poida ser presidente da CEG".
Dieter fai especial fincapé nun código ético para que "as persoas vinculadas á CEG non poidan prestar servizos, nin se servir da CEG, senón servir á CEG".
Outras reformas pasan por que un presidente "non poida estar máis de dúas lexislaturas", mentres que "haxa cambios nos votos delegados, xa que unha persoa pode ter ata 40 votos delegados, e non parece serio".
DÉBEDA
No tocante aos problemas económicos da CEG, Pérez Canal considera que a débeda da Confederación é "totalmente asumible", xa que os "problemas son de liquidez un pouco no curto prazo", pue "hai un déficit de 350.000 euros entre ingresos e gastos".
Así, cre que "se"poden aforrar uns 150.000 euros de gastos externos que poden ser realizados" por persoal propio da Confederación".
Tras iso, o líder dos empresarios de Ourense apunta que se negociará "unha ampliación de hipoteca cos bancos, porque a conta trimestral que se paga é moi gravosa, 80.000 euros ao trimestre, cando apenas quedan 500.000 euros de amortización". Ao respecto, espera "diferir esa cota de amortización a tres ou catro anos máis", de maneira que "se aforrarían, ao mellor, ao ano, uns 150.000 euros".
Xunto a iso, Pérez Canal avoga por un "pequeno axuste nos gastos do persoal interno" da CEG, de maneira que con eses tres cambios "se equilibran ingresos e gastos".
No relativo á débeda da CEG, Antonio Dieter subliñou que todo o que pode dicir é que se gaña "o primeiro" que fará é "unha avaliación da situación económica na que se atopa a CEG", tras o que se fará "un diagnóstico" e, en función deste, "se fará a cura que sexa necesaria". "Evidentemente, non vai ser a CEG que nós desexamos, pero si a CEG que podemos soster", agregou.
Ademais, Antonio Dieter Moure bota en cara a Pérez Canal que "foi presidente da comisión económica da CEG". "A situación económica da CEG témola nós provocada pola xestión deles, non pola xestión nosa", sentenciou.
O PESO DA CORUÑA
Dado que se prevé que a elección do presidente da CEG poida ser igualada, unha cuestión que xogarán un papel clave serán os votos da provincia de A Coruña, a que conta con máis sufraxios.
O presidente dos empresarios coruñeses (CEC), Antonio Fontenla, non mostrou este venres o seu apoio público a ningún candidato, e limitouse a desexar que "gañe o mellor e que deus lle dea moita sorte, que vai ter moito que traballar", polo que se dará "todo o apoio a que gañe".
De feito, en declaracións posteriores, Pérez Canal asegurou sobre Fontenla: "Eu acabo de falar con el e el díxome que non é verdade que apoie a ningún candidato neste momento". A liña seguido, indicou que o próximo martes irá expoñer o seu programa aos empresarios da Coruña.
Con todo, Antonio Dieter expresou a Europa Press que, "sendo do Sur" da Comunidade, conta "con apoios do Norte", pero aclara que é "un candidato de Galicia para Galicia", "nin de Ourense, nin da Coruña, nin de Pontevedra".
