Melchor, Baltasar e Gaspar desexaron unha boa noite a todos os ourensáns dende o balcón do Concello
A choiva non impediu que os Reis Magos acudisen puntuais á súa cita cos nenos de Ourense. Un ceo negro facía presaxiar unha tromba de auga que chegou ao mesmo tempo que os Reis Magos á Estación Empalme de Ourense, onde lles esperaba unha comitiva de máis de 400 participantes.
A Real Banda de Gaitas de Ourense foi a encargada de abrir o desfile, que este ano tiña como lema 'Mundo máxico', e que contou con cinco carrozas e grupos "procedentes" de África e do afastado Oriente. En total repartíronse 3.000 quilos de caramelos.
O antigo camión de bombeiros da cidade foi o encargado de abrir lume coas chuches. A continuación, desfilaron as dúas dotacións do tren de Ás Termas repletos de nenos --aínda que sen lambetadas-- e a carroza do Xabarín escoltada por personaxes típicos da cidade como as esculturas de 'leiteira' e do Carrabouxo.
A estrela de Belén chegou na forma dun xigantesco triciclo cunha cara sobre a que había proxeccións dixitais. Inmediatamente despois desfiló a carroza dos carteiros reais. A pé de rúa algúns dos seus empregados aínda pedían aos nenos as últimas cartas para levarlles os seus regalos esta noite.
Zancudos, fadas e estrelas humanas precederon ás carrozas interpretadas polos membros de Trécola Teatro. Portaban xigantescas bandexas e ían limpando o camiño e preguntando aos máis pequenos polas súas sobremesas preferidas.
Un grupo de exipcios con presentes de ouro ían diante da carroza do Rei Melchor, un bosque no que se podían ver fadas.
Escribas con libros de ouro e danzarinas orientais, deron paso á carroza do Rei Gaspar, que representaba un poboado. A continuación, e detrás dun grupo de malabaristas e bailarins africanos chegou a carroza do Rei Baltasar, que era un bosque con caracois xigantes.
O desfile pechárono unha carroza dedicada aos personaxes infantís da televisión e un grupo de paiasos multicolores que en vez de chuches regalaban aos nenos gomas para facerse pulseiras e outros pequenos obxectos.
