“O cambio climático constitúe un gran desafío para os bosques europeos, como amosan os recentes eventos extremos, dunha intensidade sen precedentes”. Este feito, segundo explica o director da Escola de Enxeñaría Forestal, Juan Picos, constitúe o punto de partida dun proxecto de investigación no que participan 20 institucións e organismos de doce países, entre os que se atopa a UVigo.
O obxectivo é mellorar a resiliencia dos bosques ante os desafíos derivados do cambio climático. Cun orzamento de cinco millóns de euros, a institución viguesa está representada neste proxecto por investigadores da EE Forestal e do grupo Rede, da Facultade de Ciencias Económicas e Empresariais, que se responsabilizará dun dos casos de estudo inseridos nesta investigación, centrado na cadea de valor asociada ao piñeiro en Galicia e no norte de Portugal.