Extremista é o que adopta posturas extremas, sobre todo na política e relixión. Adóitase usar como sinónimo máis ou menos imperfecto, “radical”. Pero esta palabra está relacionada con “raíz” e a súa amplísima familia. “Enraizar”, por exemplo, é botar raíces nun sitio; sexa planta, costume, persoa. Así, o verbo antigo de botar raíces, teríamolo sen cambios en “radicar”, e por evolución popular en “arraigar”. E o adxectivo do propio da raíz non é “raizal” senón “radical”. No senso matemático úsase desde finais do XVII, e no político, de reformas desde a raíz, é algo dos liberais británicos desde 1817. Así, os partidos radicais italiano (Enma Bonino) e arxentino (de Alfonsín) non son, para nada, extremistas. Sobre “radical” formáronse os substantivos “radicalismo”, o verbo “radicalizar” e deste, e novo, o substantivo “radicalización”. Todo cada vez máis lonxe da raíz e máis próximos ao extremo.
