Luisa Seara Conde, de 95 anos, faleceu o domingo en Allariz. Herdeira da histórica Confitería Luisa, que leva máis de 100 anos facendo os seus famosos amendoados na vila alaricana, Luisa Seara colleu as rendas do negocio da súa nai e despois foi a súa filla, María Jesús Plaza, quen continuou coa tradición familiar.
O legado que deixa para a hostelería alaricana é indescriptible, toda a xente que se anima a acercarse á vila alaricana sabe que non pode faltar a cita de ir a Confitería Luisa para probar os amendoados nin a tarta de améndoas que elaboran de maneira totalmente artesá. “Dende o ano 1914 levamos funcionando nisto”, comentaba a súa filla nunha reportaxe feita por La Región este mesmo mes de novembro. Despois desta etapa, ten claro que xa ninguén o vai herdar porque “non hai sucesión”.
Luisa Seara seguía gozando coa elaboración dos amendoados: “Prefiro vir aquí que botar a sesta pola tarde. Se durmo a sesta pola tarde como fan moitas, logo, á noite, que se vai a durmir?”, preguntábase.
Luisa Seara comezou vendendo os amendoados en festas e feiras da vila alaricana e arredores, aprendeu, como moitos outros reposteiros alaricanos, a elaborar a receita grazas ás monxas.
Un negocio moi escravo pero que ela o desfrutaba como nadie, facendo amendoados para toda a xente do pobo e dos arredores. Unha pioneira no seu negocio, que continuou despois a súa filla.
Luisa non podía despegarse do seu traballo, xa que para ela era “un pasatempo, ela prefería isto a estar no sofá vendo a televisión, porque se lle pasaba o tempo máis rápido”, comentaba nese reportaxe a súa filla, María Jesús Plaza.
Cando era nova, Luisa vivía con catro mulleres máis na casa, que se dedicaban todas a facer as améndoas. Un traballo duro, pero tamén unha forma de pasar o tempo para Luisa Seara. Foi o traballo da súa vida, e todos a recordarán por ise esforzo diario incalculable.
Un legado que perdurará no negocio familiar, no que a súa filla será a última herdeira.
