Manuel Bande Castro: "A festa xurdiu para traer xente a Prado e promocionar a gandería de Cartelle"

O pobo de Prado, na parroquia de Sande (concello Cartelle), verá multiplicada a súa poboación este sábado pasando dos 20 veciños habituais aos 300 que se prevé concentrar con motivo da cuarta edición da Festa da Carne ao Caldeiro. Unha celebración gastronómica que contará co mestre Manuel Bande nos fogóns. Como xurdiu a idea da festa? En Prado festexamos a Santa Lucía, que se celebra en decembro e un ano animámonos pero, como é inverno e fai frío, viña pouca xente á festa. Despois meteuse a pandemia polo medio e, cando a retomamos, cambiamos de data para ver si viña máis xente…Na primeira edición fomos 100, cando mudamos para abril chegamos aos 200 e o ano pasado, pasámonos. Este ano polos 300!”. Por que carne ao caldeiro? Na zona hai varias explotacións, e tamén noutros lugares do concello de Cartelle. A idea xurdiu un pouco diso, de promocionar a produción local. A carne que se degustará o sábado é do concello de Cartelle. Vostede será o cociñeiro, pero non se adica a isto... Non (risas). Dáseme ben o tema da cociña, pero non son cociñeiro de profesión. Eu teño unha empresa de licores en Vilavidal. Comecei con isto con Julio Gosende en Celanova, coa celebración gastronómica festa da faba xa hai uns cantos anos. Despois viñeron os callos, as lentellas… A xente gústalle como cociño. Ten algún segredo ou mestre na casa? ‘Cada maestrillo tiene su librillo’, pero a calidad é o principal. Se non utilizas materia prima de calidade, non sacas bo produto. Na casa, a miña nai si que cociña moi ben. É de Meaño e xa daquelas estivera de cociñeira no colexio, o meu pai tamén. Alá nas Rías Baixas, teño familia materna que ten restaurantes. O sábado, non todo será comer? Non. Este ano teremos a charanga Os Bandiños Band antes e despois da cea e, ao rematar, a segunda Festa da Xuventude. Tamén haberá colchonetas para os nenos… A idea é pasar un bo rato todos xuntos. Quero tamén dar as grazas aos 40 empresas anunciantes, a Asociación Cultural Entroido As Bonitas de Sande e ao Concello de Cartelle.