A Consellería de Cultura apoiará a promoción do audiovisual galego no festival 'Marché du Film', o mercado cinematográfico máis importante do mundo, que terá lugar no marco da 65 edición do Festival Internacional de Cinema de Cannes (Francia) do 16 ao 25 de maio.
Coa colaboración do Instituto Galego de Promoción Económica (Igape), a consellería estará presente no pavillón Cinema From Spain, promovido polo Instituto Nacional de Cinematografía e Artes Audiovisuais, o Instituto de Comercio Exterior e a Federación de Asociacións de Produtores Audiovisuais xunto con Catalan Films & TV.
A representación de empresas galegas que participarán no mercado está composta por Artefacto Producións, Frida Films, IB Cinema, Matriuska Producciones, Pequerrecho Produccións, Can Verde Films, Raio Verde, Tic Tac Producciones, Vaca Films, Vía Láctea Films e Zeitun Films.
No marco da liña deseñada polo plan de internacionalización do audiovisual galego, a Consellería de Cultura promoverá o cinema e a industria creada en Galicia mediante a difusión das publicacións 'Films from Galicia, Shorts from Galicia e Galicia Ways to filme.
O obxectivo principal da asistencia a esta cita está relacionado coa promoción e venda internacional das obras audiovisuais galegas, pero tamén coa coprodución e a busca de todo tipo de oportunidades financeiras e de negocio para o sector.
