Un lucense de 30 anos foi detido por axentes do Corpo Nacional de Policía acusado dun delito de lesións, por mallar supostamente un mozo ás portas dunha discoteca, sen mediar provocación, e ocasionarlle feridas de carácter grave polas que tivo que recibir asistencia médica.
Segundo informou a Comisaría Provincial de Lugo nun comunicado, os feitos ocorreron arredor das seis e media da madrugada do pasado día 26 de novembro, na cidade de Lugo.
Segundo o testemuño da propia vítima, cando estaba cuns amigos na porta de entrada dunha discoteca, o suposto agresor achegóuselle e, 'sen motivo aparente', ameazouno, polo que o mozo e os seus acompañantes decidiron deixar o lugar para non meterse en leas.
Porén, fóra xa do local, o agresor volveu achegarse á vítima e, 'sen mediar palabra', propinoulle un forte golpe no nariz, que lle provocou unha lesión de carácter grave.
A intervención das persoas que presenciaron a agresión impediu que a pelexa fose a máis, pero a vítima tivo que recibir asistencia por parte dos servizos médicos de urxencias.
O suposto autor da agresión xa fora denunciado noutra ocasión, tamén por lesións, pero carecía de antecedentes policiais.
