Os 17 membros de Anova de Redondela expulsados da formación política sosteñen que 'os feitos imputados que serven de argumentario para a expulsión carecen de fundamento xurídico e da obriga de carga de proba que asiste a calquera acusación'.
Os afectados fixeron público hoxe un comunicado en que sinalan que a 'acusación principal' é 'a de constituír unha asemblea local que xa estaba constituída, sendo isto radicalmente falso, pois a única asemblea creada era a Comarcal de Redondela'.
Indican os expulsados que a Comisión Ética e de Garantías de Anova 'non ten lexitimidade' para tomar este acordo por, entre outras cousas, 'carecer de regulamento' e carecer 'dun capítulo estatutario sobre faltas e sancións para utilizar como baremo'.
Neste sentido, indican que a citada comisión utiliza como referencia sancionadora a Lei de partidos, 'que, sen entrar a valorar os seus elementos antidemocráticos, se aplicase antes da constitución de Anova como partido político', matizan.
Os membros de Anova expulsados expresan tamén a súa 'enérxica protesta' polos comunicados dos membros da Coordinadora Comarcal de Redondela, 'cuxo contido -din- está sustentado en mentiras e interpretacións subxectivas, que teñen como única finalidade dirimir as diferenzas políticas eliminando a dialéctica por medio de purgas e expulsións'.
No seu escrito, os afectados expresan o desexo de 'trasladar a toda a localidade de Redondela que continuamos crendo na construción dunha ferramenta política ampla que traballe para Galicia e as súas clases populares'.
'Esa ferramenta é Anova -critican-, da que continuamos formando parte por riba de manobras escuras, políticas palacianas e purgas censoras'.
Os expulsados mesmo ameazan con levar este caso á Xustiza ordinaria.
'Se esta situación non se soluciona pola vía do consenso, como así defenden os estatutos de Anova, e como así defendeu Xosé Manuel Beiras, apelando ás solucións políticas dos conflitos que teñen esta única raíz e aconsellando descartar calquera outra opción, reservámonos o dereito a acudir á Xustiza ordinaria', conclúen.
