O Instituto Galego de Promoción Económica (Igape) apoiará microempresas, pemes novas e competitivas con até 120.000 euros de financiamento a través dunha nova versión do programa re-imaXina.
O conselleiro de Economía e Industria, Javier Guerra, informou hoxe nunha rolda de prensa da reapertura do programa re-imaXina 2011, que ao seu xuízo é un dos máis importantes que impulsa a Xunta, cuxo obxectivo é 'facilitar ás pemes o acceso ao financiamento'.
Re-imaXina apoiará as empresas a través de tres liñas de financiamento, a primeira para microempresas cun financiamento dun máximo de 25.000 euros que cubrirá até 100% dos investimentos.
As microempresas terán un prazo de pagamento de cinco anos, cun de carencia, e non terán comisións nin penalizacións, do mesmo xeito que a segunda liña, chamada Peme nova, dedicada a empresas que teñen menos de dous anos e que poderán acceder a un financiamento de entre 25.000 e 120.000 euros, que cubrirá até 90% do investimento.
A mesma cantidade de diñeiro, con iguais condicións, entregarase para a terceira liña, chamada Peme competitiva, dedicada a empresas que teñen máis de dous anos, apoiando até 75% do investimento.
Re-imaXina creouse hai un ano e medio e xa apoiou 700 empresas, que xeraron investimentos de novos emprendedores de máis de 22 millóns de euros e 21 millóns en préstamos, informou Guerra.
O conselleiro indicou que as pequenas e medianas empresas son 'o foco polo que están apostando', especialmente a 'proxectos solventes' que crean emprego e reactivan a economía, xa que este é un momento de 'reimaxinarse, nacer e medrar'.
Guerra destacou ademais o 'recoñecido' papel do Igape como un dos instrumentos 'máis eficaces para a reactivación do tecido empresarial de Galicia'.
O Igape avalou a máis de 1.600 empresas nos dous últimos anos, cun investimento próximo aos 273 millóns de euros, segundo o conselleiro.
Guerra tamén destacou a 'axilidade administrativa' do sistema telemático para a creación de sociedades, que permitiu crear 160 novas empresas nos últimos dous anos, nun termo medio de tempo para a creación de sociedades limitadas de novas empresas de 1,44 días, 'o máis reducido de toda España', segundo Guerra.
Ao ser consultado polos cambios nas oficinas internacionais do Igape, Guerra informou de que se abrirán nove oficinas e que serán reformadas as cinco que xa existen para 'xestionar mellor os recursos', pois as 14 oficinas utilizarán practicamente o mesmo orzamento que é investido agora.
