Quen é Luísa Villalta, a homenaxeada este ano polas Letras Galegas

Como cada ano, achégase o Día das Letras Galegas, un evento instituido en 1963 pola Real Academia Galega para homenaxear aos distintos artistas que achegasen ao patrimonio da lingua galega, principalmente, no campo da literatura. Este ano 2024, a homenaxeada é Luísa Villalta, a sexta muller en ser homenaxeada durante esta xornada desde a súa institución.

Luísa Villalta Gómez foi coñecida polos seus grandes dotes artísticos, os cales levaron a explorar diferentes campos. Foi escritora, filóloga e violinista. Nacida na Coruña no ano 1957 e falecida en 2004, foi elixida este ano para ser homenaxeada pola RAG, proposta pola escritora e académica Ana Romaní e apoiada por Chus Pato, Marilar Aleixandre, Fina Casalderrey, Margarita Ledo Andión, Manuel Rivas, María López Sández, Eulogio R. Ruibal, Dolores Sánchez Palomino e Manuel González González.

Ao longo da súa vida escribiu poesía, teatro, narrativa de ficción, ensaio, artigo e tradución. Da súa obra, a RAG destaca que "foi unha creadora dunha obra única e sólida que a converteu nunha das grandes figuras da literatura galega xurdida na segunda metade dos anos 80 e principios dos 90".

Escoito a voz que me silencia: comezo a expresar o necesario

A música foi unha das ocupacións principais de Luísa, obxecto dos primeiros artigos e o foco de moitas das reflexións de ensaio publicadas posteriormente. Estes anos dedicados á música marcan acentuadamente o trazo significativo da súa poesía, ademais de ser base na articulación da súa obra literaria.

Durante a madrugada do 6 de mazo de 2004, faleceu de meninxite na súa casa, mentres durmía. Cunha axenda chea de eventos, a morte chegoulle á escritora, sendo todos nos que ela participaba ou asistía anulados. Unha despedida chea de personalidades do mundo da literatura foi protagonizada pola música dun violín, que lembraba unha das paixóns de Luísa. Os seus restos mortais repousan no cemiterio de Santo Amaro na cidade herculina.

Bibliografía

Poesía

• "Música Reservada" (1991)
• "Ruído" (1995)
• "Rota ao interior do ollo" (1995)
• "Apresados sen presa" (2002)
• "Estudo das sombras" (2002)
• "Modulación de Orfeu" (2002)
• "Conxuro" (2003)
• "En concreto" (2004)
• "O papagaio" (2006)
• "As palabras ingrávidas" (2020)
• "Pensar é escuro. Poesía reunida" (1991-2004) (2023)

Ensaio

• "O Don Hamlet de Cunqueiro: Unha ecuación teatral" (1992)
• "O outro lado da música, a poesía: relación entre ambas partes na historia da literatura galega" (1999)
• "Poética. Sobre un certo estado de conciencia" (2002).
• "A lingua dos sons" (2003)
• "A Música e Nós" (2003)
• "Libro das colunas" (2005)
• "O outro lado da música, a poesía" (2021)

Narrativa

• "Siléncio, ensaiamos" (1991)
• "Teoría de xogos" (1997)
• "As chaves do tempo" (2001)
• "Desperta do teu sono" (2002)

Teatro

• "Concerto para un home só" (1989)
• "O representante" (1990)
• "O paseo das esfinxes" (1991)
• "As certezas de Ofelia" (1999)
• "Os doces anos da guerra" (2001)
• "Obra dramática completa. Sinfonía de escenas" (2018)