Traballo defende que o seu departamento traballa coas empresas que "gañan concursos" e rexeita ser "xuíz"
O xulgado número 1 de Lalín reclamou á Xunta documentación sobre os cursos de formación que lograron subvencións públicas da empresa Prosem Consultoría Estratéxica S.L., á que investiga por supostas irregularidades na súa actividade, as cales negou "rotundamente" a empresa.
Fontes da Consellería de Traballo explicaron a Europa Press que, polos datos que ten, se trata dunha investigación que "ten a súa orixe" nunha suposto "fraude fiscal". A investigación xudicial está dirixida pola Fiscalía de Pontevedra.
Ao respecto, indicaron que a Xunta coñeceu esta investigación porque "o propio xulgado lle solicitou documentación de diversos departamentos".
As mesmas fontes engadiron que a Administración autonómica é "a primeira interesada en que, se existe calquera irregularidade relacionada con axudas, subvencións, que se depuren as responsabilidades".
Así as cousas, concluíron que a Xunta "seguirá colaborando coa xustiza neste caso, ao igual que se fai sempre, en todo aquilo que sexa requirido".
TRABALLAR CON QUEN "MEREZA" OS CONCURSOS
Pola súa parte, a conselleira de Traballo e Benestar, Beatriz Mato, defendeu que a Xunta traballa "con todo aquel que o mereza e gañe os concursos". Díxoo, en declaracións aos medios en A Coruña, ao ser preguntada por se continuarán facendo concursos coa empresa Prosem.
"A conselleira non é xuíz de nada", replicou. Ademais, recalcou que son os xuíces "os que teñen que habilitar ou inhabilitar calquera entidade ou persoa que cometa ou supostamente cometa un delito".
Así mesmo, incidiu en que o papel da Administración autonómica se limita "a seguir os seus procedementos" e a actuar con "seguridade, rigor e dilixencia" para que o diñeiro público "se utilice correctamente".
Non obstante, dixo que, "ata que os xulgados xulguen as empresas", a Xunta seguirá "traballando con todo aquel que o mereza e gañe concursos".
Preguntada explicitamente se continuarán colaborando con esta empresa investigada, dixo que a Administración autonómica saca convocatorias públicas, ás que "se presenta calquera", engadiu.
INSPECCIÓN 2010
A empresa Prosem Consultoría Estratéxica, constituída en Lalín no ano 2008 e que se dedica á formación en áreas como consumo, igualdade ou profesionais en activo, conta na actualidade cun equipo de tres traballadores.
Segundo defendeu, é "rotundamente falsa a comisión de actividades irregulares" en cursos de formación impartidos. Ademais, explicou que dende a inspección que a Axencia Tributaria realizou a Prosem en relación ao exercicio 2010, saldada cunha liquidación de cero euros, a compañía foi obxecto de novas inspeccións que "finalizaron sen detectar anomalías nin sancións".
Prosem, que se puxo a "disposición" das administracións Fiscal, Tributaria e Fiscal para "achegar toda a documentación" que sexa requirido, indicou que pechou o exercicio 2010 cunha cifra de negocio de 247.448,53 euros
