A execución de diferentes proxectos de obras nos vindeiros meses con axudas de varios organismos suporá un investimento de preto de 300.000 euros no municipio do Irixo
A execución de diferentes proxectos de obras nos vindeiros meses con axudas de varios organismos suporá un investimento de preto de 300.000 euros no municipio do Irixo.
Concretamente, ó abeiro do Plan Marco e cun importe de 85.000 euros, o Concello vai levar a cabo os traballos de mellora de camiños de acceso a explotacións agrarias nas localidades de Lagorzos, Segade, Carballal e Parada Laviote. Estas obras son posibles tendo en conta que os devanditos percorridos lindan con fincas de cultivo cuxos propietarios reciben axudas do Plan Agrario da Unión Europea.
Asímesmo, ó traverso dunha subvención do Fondo de compensación territorial de 53.000 euros, prevése rematar a Ruta dos Castros, un sendeiro que permite a veciños e visitantes coñecer os antigos asentamentos de poboación existentes no Irixo.
Por outra banda, a Vicepresidencia da Xunta destinará un importe de 60.500 euros ó pavimentado dos accesos a diversos núcleos rurais do municipio, mentres a Deputación provincial aporta unha axuda de 100.000 euros para o arranxo de estradas municipais en varias parroquias. Tódolos proxectos teñen coma obxectivo artellar unha rede de comunicacións entre o máis dun cento de aldeas que integran O Irixo, así como ofrecer unha mellor imaxe das potencialidades turísticas que posúe o patrimonio histórico do municipio.
