Coincidindo co remate das festas patronais de San Cibrao, o Centro de Estudios Chamoso Lamas organiza o próximo domingo, 18 de setembro, un roteiro cultural que se desenvolverá polo casco urbano e que estará guiado polo historiador Carlos Montes Marqués.
Esta iniciativa, que conta co patrocinio da Adega Pazo Tizón e a colaboración do Concello do Carballiño, enmárcase no programa de actividades desenvolvido polo Centro de Estudios Chamoso Lamas ao longo deste ano e que continuará os días 7,8 e 9 de outubro coa celebración do XII Congreso do colectivo cultural carballiñés.
O roteiro comezará ás 12,00 horas no patio da Residencia Irmáns Prieto e percorreranse algúns dos lugares máis significativos do casco urbano carballiñés vencellados coa historia da vila. Ao remate do roteiro, sobre as 14,00 horas, ofrecerase aos participantes un viño e unha tapa de empanada por xentileza da Adega Pazo Tizón.
O historiador Carlos Montes Marqués, integrante do Centro de Estudios Chamoso Lamas, é o autor do traballo titulado “As orixes do Carballiño (1600-1750)”, que foi publicado no número 3 da revista Argentarium, e que contén un exhaustivo acopio documental sobre as circunstancias históricas que deron lugar ao nacemento do Carballiño, incluindo as redes de comunicación, os lugares como o barrio de Flores ou Porto Carreiro, as disputas xurisdicionais, entre outros aspectos.
