Abraiados polas gaitas nun museo agochado en Ourense

Polo Museo Internacional da Cornamusa pasan centos de escolares ao ano. Veñen de Ourense, pero tamén hai excursións chegadas desde países como Inglaterra ou Francia interesados na cultura popular. No barrio das Lagoas ubícase esta colección de gaitas que traspasa fronteiras. Hai 30 anos que Fraga inaugurou o edificio e aínda hai quen, a pesar de repetir visita, se sorprende con algo novo agochado no interior. Sempre hai novidades: están a piques de chegar dúas cornamusas dende Xeorxia para completar a inmensa colección ourensá (preto dun cento de instrumetos). Os rapaces de 11 anos do campamento de Amencer descubrían onte a inmensidade deste museo e ficaban coa boca aberta cando ouvían tocar ás novas xeracións da Real Banda de Gaitas de Ourense ou se daban conta de que diante dos fuciños tiñan obxectos con séculos de historia. Sen dúbida, a gaita que máis cativou ao público foi a do turupil con barquín. É unha cornamusa procedente de Estonia, feita coa pel do raposo. Máis dun quedou abraiado por este obxecto de colección: “Pero este é o raposo de verdade?”, preguntaban os nenos. Tamén lles chamou a atención que no Museo Internacional da Cornamusa se custodie a gaita máis grande do mundo. O director do museo, Xosé Lois Foxo, explicoulle aos rapaces que este instrumento “pesaba moito e por iso levaban un burro que a transportaba”. Os nenos máis agudos da visita levaron premio. Despois dunhas preguntas sobre o percorrido polo museo, os dous que máis acertaron marcharon para a casa cun álbum da Real Banda de Gaitas de Ourense. As novidades O Museo Internacional da Cornamusa é unha das referencias turísticas da cidade. A pesar de non estar no centro, sempre hai viaxeiros que se trasladan ata As Lagoas para completar o seu coñecemento de Ourense. O museo busca modernizarse: acaban de incorporar códigos QR á entrada do edificio, cos que o visitante pode descubrir as gaitas de diversas partes do mundo, así como escoitar o seu son con apenas un clic. Por outra banda, as pinturas do coruñés Xosé Casal enchen aínda máis de vida as paredes do museo. Fixo obras de varios gaiteiros, entre os que se pode atopar á pioneira ourensá Áurea Rodríguez, a primeira gaiteira galega documentada. Era de Cartelle.