O Concello de Barbadás incrementará as axudas para libros de texto e material escolar ao alumnado de centros públicos e concertados. Neste curso foron 42 os beneficiarios cunha cantidade máxima de 100 euros por neno e incluso concedéronse a familias que superaban a renda máxima esixida, sinalaron desde o goberno local.
Nos últimos anos, a cantidade subvencionable foise aumentando, así como o máximo de renda por unidade familiar para dar cabida a máis solicitudes. Tal e como explican dende a concellería de Educación que dirixe Marga Pérez, trátase dunha axuda para a compra de libros e material escolar do alumnado de Barbadás matriculado tanto en colexios públicos como en concertados e destinada a familias en desvantaxe social e con menor poder adquisitivo. “No afán de seguir colaborando, o Concello seguirá incrementando a contía das axudas”, afirma Marga Pérez.
