Eduardo López: "No 1954 'bocarribeira' era un temo que só entendía Otero Pedrayo"

Eduardo López Pereira, presidente da Fundación Ramón Otero Pedrayo, explica a orixe do termo que o integrante do Grupo Nós acuñou nos seus escritos, en referencia a unha localización na que se inspiraba e que agora dará nome a un miradoiro na súa honra. Cando se entregará o Premio Trasalba de este ano? O Premio Trasalba de este ano, que se outorgou a Luis Davila, entregarase o último domingo de xuño, que este ano é o día 25. É un premio que ten unha grandísima tradición. O ano pasado fixemos un pequeno libro coas biografías de todos os premiados. Dende Xoaquín Lorenzo Fernández ata Carlos Mella, que foi o último e que agora substitúe o ilustrador e viñetista Luis Davila. Hai unhas semanas coñecíase a construción dun miradoiro en Trasalba. Si. A Deputación comunicoume hai un mes que se lle outorgaron á fundación Ramón Otero Pedrayo 8.000 euros para completar o espazo sobre o que vai ser construído o miradoiro Bocarribeira Otero Pedrayo. Por que Bocarribeira? Porque en 1954 Carballo Calero escribíalle unha carta, que está publicada, a Otero Pedrayo na que lle pregunta: “Ramón, ¿puede usted decirme la definición exacta por el término que está utilizando ‘bocarribeira’?”. Agora enténdeo todo o mundo, pero no 54 era una creación de Don Ramón. Non temos a súa resposta, pero é unha conversión da baixada que emboca a Ribeira, a que está en Trasalba e vai ata Ribeira vía Arrabaldo. Entón, nada mellor que colocar o miradoiro alí nese entorno, que ten unha visión histórica do río Miño serpeante ata Ribadavia na que Otero Pedrayo se inspiraba. A inauguración está prevista para o 25 de xuño, conseguirase para esa data? Actualmente o proceso administrativo vai con atraso. O orzamento comunicouse, agora falta a entrega dese diñeiro para poder comprar o terreo, porque a outra parte xa era de Otero Pedrayo, estamos falando para concretar. Tendo en conta os procesos administrativos, aínda nen comezaron as obras. Vai ser imposible. Unha vez a Deputación me remita esa cantidade o proxecto xa está esbozado e sería poñelo en marcha. Pero tamén dependemos da compra ao Concello de Ourense, a quen pertencen os terreos. Dependemos dos trámites administrativos. Ademais do Premio Trasalba hoxe entrégase o Premio Escolares, quenes son os gañadores? Si. Estará o secretario xeral de Política Lingüística e outros membros académicos coma os do xurado e membros do patronato. Os premiados son: unha clase do IES Dionisio Gamallo Fierros de Ribadeo, que fixo un traballo moi importante, porque descubriu uns inéditos entre Dionisio Gamallo Fierros e Otero Pedrayo. Ademais, hai dous premios individuais: un, a Patricia Fernanda García do IES As Barxas de Moaña, por unha curta de animación de un conto de Otero Pedrayo; e outro, a Alexandre Faria del IES Castelao de Vigo, polo seu traballo literario “O conto número 21”. Que outros retos ten a Fundación para este ano? Estabamos sumidos nun proceso de concesión dunha axuda da Consellería de Educación para arranxar o entorno do Souto do Pazo de Otero Pedrayo e os xardíns. Estou ledo porque o conseguimos e vai ser algo excepcional.