Un alumno de oito patas en Castrelo de Miño
Este ano no colexio de Castrelo de Miño matriculouse un alumno moi especial. O seu nome é Oitopés e chegou a esta comunidade educativa da comarca do Ribeiro cun obxectivo: fomentar a lectura entre os alumnos do centro. É a nova mascota da biblioteca recentemente inaugurada e que leva o seu nome.
A chegada de Oitopés ó colexio foi unha festa. Para celebrala, os alumnos representaron a obriña “Non quero ser un polbo” e fixeron un montón de manualidades relacionadas con este novo compañeiro: diademas, debuxos, decoración das paredes e ventanais do centro…
A chegada de Oitopés trae consigo unha gran dinamización do espazo da biblioteca. Ademais de garantir o servizo de préstamo de libros, as instalacións constitúen o núcleo do centro. Delas parten tódolos proxectos que se desenvolven ó longo do curso.
Foron os propios alumnos os que escolleron o nome da súa nova mascota e, dende entón, Oitopés é un máis da actividade diaria en Castrelo de Miño. Coa súa axuda, este ano estase ampliando a biblioteca e dotándoa de novo mobiliario e máis material para poder aumentar os proxectos que dela saen.
Toda a comunidade educativa está moi contenta da chegada de Oitopés ó seu centro. Con el traballan agora man a man para que as actividades non descansen e a formación dos alumnos de Castrelo se amplíe máis alá das aulas.
