Xornal Escolar
Un chifro que é historia do jazz
Luíntra tivo un papel salientado na historia do jazz hai agora 70 anos. De feito, foi o veciño da localidade José María Rodríguez o que fixo soar o chifro que inspirou ó folclorista norteamericano Alan Lomax e que posteriormente se empregou nunha gravación do coñecido músico Miles Davis.
Hai uns días, sete décadas despois dese acontecemento, o chifro de capador de José María volveu soar en Luíntra lembrando aquelas notas que inspiraron o inicio da canción “The pan piper”, publicada dentro do disco “Sketches of Spain” no ano 1960. Foi no colexio, onde os alumnos realizaron unha investigación para divulgar e poñer en valor esta historia internacional.
Ata o centro educativo achegáronse veciños, familiares e representantes institucionais para participar no acto de inauguración dos tres murais cos protagonistas desta historia realizados no patio escolar polo artista Antón P. Couto. Ademais, os asistentes tiveron a oportunidade de escoitar a historia e os descubrimentos da investigación contada polo alumnado da escola e coñecer máis detalles desta singular historia co testemuño de Celita, a sobriña de José María. A guinda deste acto foi o chifro do capador, que volveu soar en directo despois de 70 anos. Foi unha xornada moi especial para Luíntra e para a historia do jazz.