Cada ano, a Deputación Provincial elixe un tema e, sobre el, organiza a chamada Semana Escolar, que este ano acadou a súa novena edición. “O patrimonio histórico da provincia” é o libro escrito por Xosé Antonio Perozo sobre o que traballaron este ano preto de 7.000 alumnos de 46 centros escolares.
O obxectivo da iniciativa é achegar ós máis novos á historia e riqueza de Ourense a través de traballos sobre diferentes aspectos. Nesta ocasión con Aurea como protagonista dunha historia na que vai percorrendo a provincia para amosar a súa monumentalidade seguindo unha liña histórica e estilística, deténdose no valor patrimonial dos espazos e a súa importancia cultural. Un percorrido histórico enriquecido con rutas polo patrimonio natural e termal de Ourense.
Un dos centros que participou na iniciativa foi o Padre Feijóo Zorelle. Alí, alumnos de Educación Primaria e Secundaria estiveron investigando sobre toda a riqueza patrimonial e histórica dos diferentes concellos, realizando exposicións para os seus compañeiros e compartindo os datos máis interesantes que foron acadando. Como resultado final, en sexto tamén elaboraron uns completos murais afondando en características coma o patrimonio termal de toda a provincia. A Semana Escolar da Deputación volveu ser un éxito, tanto de participación como de resultados.
