Faltan poucos días para que o Entroido chegue á provincia con toda a súa forza, pero as máscaras tradicionais xa están listas e algunhas xa comezaron o seu percorrido polos colexios ourensáns. É o caso do CEIP O Couto, que recibiu a visita dunha “bonita” de Sande (Cartelle).
Con tódolos seus elementos decorativos, esta máscara acudiu a ofrecerlles ós alumnos unha charla sobre a historia do traxe e de cada un dos elementos que o compoñen. Os cativos non dubidaron en facerlle preguntas para coñecer máis sobre o Entroido deste núcleo e, para agradecerlle a visita, fixéronlle uns agasallos de recordo.
Agora, o alumnado ultima os seus disfraces para celebrar a festa máis agardada a vindeira semana.
