Xornal Escolar
Tardes para a lembranza en Amencer
Un ano máis -e xa suma unha década- o Tempo de Troula de Amencer ofrécelle ás familias de Ourense unha alternativa lúdica e divertida para as tardes de setembro, un tempo no que aínda non comezaron as actividades extraescolares e nalgunhas casas aparece o problema da conciliación.
Este ano son moitos os cativos que cada tarde acoden ó local da asociación xuvenil nunha edición do programa no que a protagonista é a normalidade, que voltou ás aulas co comezo do curso e tamén permite desenvolver con maior facilidade esta proposta -que durante dous anos tivo que adaptarse ás restriccións pola pandemia-. Agora, coas caras descubertas comparten momentos para a lembranza con total liberdade.
Xogos cooperativos, obradoiros didácticos e, sobre todo, moita diversión e convivencia enchen cada día o recinto, ubicado dentro do colexio Salesianos. Dende a organización explican que os obxectivos de Tempo de Troula son “educar en valores a través do xogo, favorecer a creatividade dos máis novos e favorecer tamén a participación e o traballo en equipo”, así como facilitar a conciliación de vida familiar e laboral.
Mentres Amencer prepara o seu programa de actividades para desenvolver durante todo o curso, os monitores reciben cada tarde a ducias de cativos de Educación Infantil e Primaria con moitas ganas de gozar.