O voceiro do BNG, Camilo Vila, advirte do aumento dos actos vandálicos no monumento de Castelo de Pena. Camilo Vila e Manuel Pozo, concelleiros do BNG en Xinzo de Limia, recolleron as demandas veciñais sobre o deterioro que está sufrindo o complexo do Castelo de Pena. A veciñanza xa ten posto en coñecemento dos corpos e forzas de seguridade a situación e solicitan tamén solucións políticas.
O BNG xa se puxo en contacto coa direción da última intervención arqueolóxica para informar e solicitar que se emita o pertinente informe técnico á Xunta de Galicia. Do mesmo xeito, demandan un plan estratéxico para que o o monumento cobre un verdadeiro significado para a veciñanza a través do seu coñecemento, o seu uso e o seu desfrute. Deste xeito, recomenda ó Concello de Xinzo de Limia “botar man disto inmediatamente porque é un risco para as persoas e o patrimonio”. O alcalde, Amador Díaz, declarou que “comprobarán o que está sucedendo”.
